Shqipëria i ka nisur me humbje kualifikueset e Boterorit të vitit 2026, me Anglinë që triumfoi me rezultatin 2-0 ndaj kuqezinjve në “Wembley”.
Një ndeshje pa shumë histori me vendasit që kontrolluan lojën duke shënuar nga një gol në secilën pjesë.
Ndeshja nisi me një kontroll asfiksues të topit nga skuadra angleze. Pasime të shumta dhe një ritëm i lartë nga “Tre Luanët”, që detyruan kuqezinjtë e Sylvinhos të luanin në gjysëmëfushën e tyre.
Goli dukej çështje kohe dhe në fakt kështu ishte, pasi do të vinte minuta e 20, aty ku një vertikalizim i saktë nga Bellingham do të nxirrte të lirë 18 vjeçari debutues Lewis-Skelly që godet saktë duke përfituar edhe nga një hezitim i Asanit për sjellë golin e parë të Anglisë.
Ekipi ynë mundohet të reagojë në të 28, por ishim të pafat teksa topi devijuar në këmbët e Burn shkon në traversë. Anglia tenton të dyfishojë shifrat në të 35, aty ku Bellingham pati një shans të artë, por Strakosha neutralizoi mjaft mirë gjithçka.
Fundi i fraksionit të parë foli sërish për të besuarit e Tuchel, aty ku Bellingahm, Kane dhe Burn iu afruan ndjeshëm golit, por Strakosha dhe fati ishte në anën e kuqezinjve, duke bërë që Shqipëria të shkojë në pushimin e pjesëve me disavantazhin e vetëm një goli.
Në pjesën e dytë ritmi mbetet i njëjtë me vendasit që dominojnë në kontrollin e lojës, ndërsa ekipi ynë mendon thjesht të mbrohet. Broja do të ishte lëvizja e parë e Sylvinhos pas më shumë se sa 1 ore lojë.
Futja e Brojës i dha kuqezinjve më shumë kreativitet përpara, me 24-vjeçarin që u mundua të ishte aktiv, duke vendosur në vështirësi në disa momente prapavijën e anglezëve.
Por Anglia në këtë moment na ndëshkon sërish me sulmuesi kryesor të saj Harry Kane, që në minutën e 77, i shpëton mbulimit të Ajetit e nuk fal për ta çuar topin në rrjetë.
2-0 rezultati final në “Wembley” dhe kështu e nisim me humbje fushatën e eleminatoreve drejt Botërorit 2026, ndërsa mundësia për pikë do të jetë pas 3 ditësh ndaj Andorrës në Tiranë.
