Një polemikë e madhe ka shpërthyer mes dy rivalëve të Manchesterit, pasi disa lojtarë të akademive të Manchester United dhe Manchester City janë akuzuar për manipulim të moshës, duke dyshuar se ata mund të jenë në të vërtetë më të rritur.
Sipas ‘The Telegraph’, janë shfaqur prova që vënë në dyshim moshën e gjashtë futbollistëve, të cilët janë transferuar në Mbretërinë e Bashkuar vitet e fundit – tre prej tyre kanë luajtur tashmë për kombëtaret e moshave të Anglisë.
Nuk ka asnjë provë që Man. United apo Man. City kanë lejuar me vetëdije një mashtrim të tillë. Prindërit e futbollistëve të tjerë kanë shprehur shqetësimet e tyre pranë klubeve, Premier League dhe Federatës Angleze.
‘The Telegraph’ shkruan se një skandal i manipulimit të moshave në klubet angleze mund të ngrejë dyshime për trafikimin e fëmijëve në Mbretërinë e Bashkuar.
Si United, ashtu edhe City, si dhe Federata Angleze dhe Premier League, kanë refuzuar të komentojnë mbi këtë çështje.
Tre nga gjashtë lojtarët në hetim janë të përfaqësuar nga i njëjti agjent, i cili ka reaguar duke e quajtur këtë një “fushatë shpifjeje”.
“Ka një lloj mafieje që po vepron pas këtyre lojtarëve. E vërteta gjithmonë do të fitojë.
Nuk do të ndalojnë këta djem. Ata kanë talentin e dhuruar nga Zoti. Askush nuk do ta shkatërrojë karrierën e tyre, askush,” – është shprehur ai për ‘The Telegraph’.
Një nga prindërit e futbollistëve të tjerë nuk e fshehu shqetësimin e tij për situatën:
“Ka një problem të madh me mbrojtjen e fëmijëve. Kjo mund të jetë jashtëzakonisht e rrezikshme. Imagjino të përballesh me një kundërshtar që është një kokë më i gjatë dhe shumë më i fortë se ty.
Është e gabuar dhe mashtrimi më i madh ndonjëherë,” – ka deklaruar ai, duke shtuar se disa nga këta lojtarë mund të jenë katër ose pesë vjet më të mëdhenj se mosha që pretendojnë.
Një tjetër familjar ka zbuluar një rast ku një nga këta lojtarë ka goditur një tjetër tri herë në fytyrë:
“Kur vijnë këtu, ata futen në sistemin tonë shkollor. Nëse një djalë 16-vjeçar futet në një klasë me 11-12-vjeçarë… 16-vjeçarët kanë dëshira seksuale, etj… Ku mund të çojë kjo situatë?”
Rasti i Amad Diallo-s
Gjithashtu, janë ngritur dyshime se disa nga këta lojtarë mund të jenë trafikuar nga vendet e tyre të origjinës, duke u përmendur si shembull Amad Diallo, futbollist i Manchester United, i cili në të kaluarën është hetuar për çështje të ngjashme. /The Telegraph
