Nedim Bajrami u shpreh i gatshëm për sfidën e së premtes ndaj Anglisë dhe pse nuk ka qenë një titullar fiks me skuadrën e tij Rangers në ndeshjet e fundit.
“E kam filluar mirë te Rangers, por tashmë s’po gjej shumë minuta, megjithatë kam qenë shumë i përkushtuar dhe nuk kam humbur asnjë stërvitje. Si në krah dhe në mesfushë e ndjej veten mirë. Kudo të vendosë Sylvinho, unë jam gati”, tha Bajrami.
Më tej, ai tha se grupi është i plotë edhe me rikthimin e Armando Brojës dhe do të bëjë gjithçka për një rezultat pozitiv në “Wembley”.
“Në Skoci është një ligë shumë fizike. Anglia luan ashtu. Besoj se të gjithë çunat janë gati edhe tani që është kthyer Broja jemi të plotësuar. Do të jetë një ndeshje ndryshe, unë do të jap maksimumin dhe besoj se të gjithë çunat janë gati”, tha Bajrami.
Kombëtarja do të vazhdojë sot stërvitjen në orën 16:00, ndërsa ditën e mërkurë do të niset për në Londër.
