Joao Palhinha nuk ka rezultuar një blerje e suksesshme te Bayern. Ai u transferua verën e kaluar nga Fulham me jo pak bujë. Ai zgjodhi bavarezët në kulmin e karrierës, por duket se po vuan në Mynih.
Leon Goretzka, Aleksandar Pavlović dhe Konrad Laimer janë zgjedhur si titullarë nga trajneri Kompany më shumë se portugezi, i cili deri tani konsiderohet zgjedhje e katërt në mesfushë.
Palhinha ka luajtur vetëm 658 minuta, ndërkohë që Goretzka ka dyfishin e minutave të tij. Pavlović dhe Laimer kanë gjithashtu më shumë minuta në këmbë, ndonëse ky i fundit shpesh si mbrojtës i djathtë.
TZ raporton se Bayern po konsideron shitjen e mesfushorit në merkaton e verës, një vit pas blerjes së tij. Arsyeja është mospërshtatja e tij me filozofinë e lojës së Kompany.
Belgu kërkon që mesfushorët të kenë përdorim të mirë të topit dhe të luajnë sa më lart, pra me karakter ofensiv. Palhinha është kryesisht lojtar defensiv, për thyerje aksionesh dhe duele direkte.
