Fëmijët që frekuentojnë Sephoran apo dyqane të tjera me produkte kozmetike në SHBA mund të hasin një pengesë në pasionin e tyre për kto produkte, të cilat kanë shpesh përbërës që nuk u përshtaten moshës së tyre, nëse një propozim i ri ligjor miratohet në Kaliforni.
Siç raporton Los Angeles Times, deputeti demokrat Alex Lee nga San José ka paraqitur një propozim ligjor që do të ndalonte shitjen e produkteve kundër rrudhave për personat nën 18 vjeç. Një ndalim i ngjashëm me atë për shitjen e alkoolit, mund të thuhet. Produktet që përmbajnë përbërës aktivë si vitamina A (përfshirë retinolin dhe retinoidët), vitamina C dhe alfa-hidroksiacidet [AHA] – të përdorura shpesh për të trajtuar ose parandaluar rrudhat dhe probleme të tjera të plakjes – do të ishin të kufizuara si produkte të cilat nuk janë të përshtatshme për lëkurën e adoleshentëve.
“Industria e bukurisë po përfiton nga fenomeni i ‘fëmijëve Sephora’, ku fëmijët blejnë dhe përdorin produkte anti-plakje të krijuara për të rriturit,” ka thënë anëtari i Asamblesë Lee. “Fëmijët nuk kanë nevojë për produkte anti-plakje. Industria e bukurisë e di këtë dhe disa kompani e kanë pranuar problemin. Por deklaratat e tyre – në mungesë të veprimeve të vërteta dhe të rëndësishme – janë orientuar vetëm nga performanca dhe nuk janë në nivelin e një sjelljeje të përgjegjshme. Duhet ta ndalim industrinë e bukurisë të shfrytëzojë të rinjtë tanë. Është koha për të vepruar dhe ky propozim i ligjit është një masë e arsyeshme për të mbrojtur fëmijët nga produktet anti-plakje që nuk janë të nevojshme dhe mund të jenë dëmshme,” ka deklaruar ai në një komunikatë zyrtare.
Kjo nuk është hera e parë që deputeti demokrat Lee përpiqet të kalojë këtë ligj; në maj të vitit 2024 ai kishte propozuar ndalimin e shitjes së këtyre produkteve për fëmijët nën 13 vjeç, por edhe atëherë përpjekja nuk pati sukses.
Vitin e fundit, është folur shumë për fenomenin e para-adoleshentëve që bëjnë blerje në dyqanet e produkteve të bukurisë. Të rinjtë e gjeneratës Alpha, të rritur me tutoriale në YouTube dhe blerje në TikTok, janë bërë blerës të mëdhenj në Sephora, duke shpenzuar paratë e xhepit në produkte për lëkurën nga marka si Drunk Elephant dhe Glow Recipe, sprej për trupin Sol de Janeiro dhe make-up Rare Beauty. Edhe pse ideja që adoleshentët duan të eksperimentojnë me makijazhin dhe kujdesin për lëkurën nuk është një gjë e re, disa nga produktet që ata kërkojnë janë për lëkurën e të rriturve.
