Nga Boldnews.al
“Avokati Alban Toro nuk justifikon pasurinë familjare me burime të ligjshme, për këtë arsye, bashkëshortja e tij, gjyqtarja e Apelit, Elona Toro, duhet shkarkuar nga detyra”.
Me këtë sentencë, Komisioneri Publik, Florian Ballhysa, iu drejtua Kolegjit të Posaçëm të Apelimit, shkallës së dytë të Vetingut, në 25 janar 2023.
Gjyqtarja Toro u konfirmua në detyrë në 17 qershor 2020, me shumicë votash nga trupa e Komisionit të Pavarur të Kualifikimit, siç emërtohet shkalla e parë e Vetingut.
Kryesuesja e trupës së Vetingut, Firdes Shuli dhe relatorja Pamela Qirko, votuan në favor të gjyqtares Elona Toro. Ndërsa anëtarja Etleda Çiftja ishte e mendimit se subjekti duhej shkarkuar nga detyra, për shkak të pamjaftueshmërisë së burimeve financiare për pasuritë në zotërim.
Qëndrimi i anëtares Çiftja i referohej kryesisht pasurive të krijuara me burim të ardhurat e bashkëshortit të saj, Alban Toro.
Të njëjtin qëndrim mbajti edhe Komisioneri Publik, i cili kërkoi shkarkimin e gjyqtares Elona Toro, kryesisht për problemet e burimit financiar të bashkëshortit.
Por, Kolegji i Posaçëm i Apelimit (KPA) nuk e pranoi kërkesën e Komisionerit, duke vendosur konfirmimin përfundimtar në detyrë të gjyqtares Elona Toro, me vendimin e datës 2 shkurt 2023.
Në kohën që diskutoheshin këto çështje në strukturat e Vetingut, Alban Toro ishte duke konsumuar mandatin e tij 5-vjeçar si anëtar i Këshillit të Lartë Gjyqësor (KLGJ), ku u emërua nga radhët e avokatëve në vitin 2019.
Paralelisht me vetingun e bashkëshortes, Alban Toro ishte subjekt i një hetimi disiplinor dhe panel, në dyshimet se kishte falsifikuar dokumentat që e kualifikonin për emërimin si anëtar i KLGJ-së.
Në të njëjtën njësi kohore, Alban Toro po përballej me tre plane; hetim disiplinor nga Inspektori i Lartë i Drejtësisë për dokumentacionin e emërimit në KLGJ; hetim penal nga Struktura e Posaçme Anti-Korrupsion (SPAK) për çështjen e dyshuar të falsifikimit të dokumentave; dhe hetim administrativ për pasurinë, si bashkëshort i gjyqtares Elona Toro.
Natyrisht, këto përballje duhet të jenë shumë të vështira për një individ të vetëm. Por, duket se Alban Toro ka “yllin e fatit” në krahun e tij.
Siç ka publikuar më herët “Boldnews.al”, hetimi administrativ për dokumentacionin e Alban Toros u përfshi në një ping-pong mes Inspektorit të Lartë të Drejtësisë dhe Këshillit të Lartë Gjyqësor, pa arritur asnjëherë në një konkluzion.
Hetimi penal për “falsifikimin e dokumentave” të Alban Toros është pluhurosur në sirtarët e Prokurorisë së Posaçme prej vitit 2021 dhe, deri më tani, nuk ka asnjë të dhënë mbi ecurinë e procedimit penal, megjithëse kanë kaluar mbi 4 vjet.
Ndërsa hetimi administrativ për pasurinë në Vetingun e Elona Toros, përfundoi me sukses edhe për bashkëshortin e saj, Alban Toro, pavarësisht se një anëtare e trupës së shkallës së parë të Vetingut, si edhe Komisioneri Publik, ishin të bindur se ai nuk justifikonte pasurinë me burime të ligjshme.
Pas këtyre “beteja”, ku njëra ka më shumë problematika se tjetra, Alban Toro përfundoi mandatin 5-vjeçar në Këshillin e Lartë Gjyqësor dhe është një prej kandidaturave për plotësimin e një vendi vakant në Gjykatën Kushtetuese.
Njeriu që “theu Kushtetutën”, tashmë tenton që të shndërrohet në mbrojtësin e saj, duke synuar një karrige në trupën më të lartë gjyqësore në vend.
