Dy persona në Vlorë janë arrestuar dhe një 16-vjeçar është vënë nën hetim, pasi gjatë orëve të mëngjesit, kanë thyer xhamat e një marketi dhe kanë vjedhur një shumë parash.
Policia bë me dije se ngjarja ka ndodhur në lagjen ’29 Nëntori’, ndërkohë që po hetohet për të dokumentuar vjedhje të tjera që këta shtetas mund të kenë kryer.
“Menjëherë pas njoftimit se në orët e para të mëngjesit të datës 16.02.2025, ishin vjedhur me thyerje, 20 000 lekë, në një market në lagjen “29 Nëntori”, strukturat hetimore dhe operacionale të Komisariatit të Policisë Vlorë kanë organizuar punën për të identifikuar dhe nxjerrë përpara përgjegjësisë penale, shtetasin/t përgjegjës.
Si rezultat u identifikuan të tre autorët e vjedhjes, konkretisht shtetasi G. M., 26 vjeç, një 17-vjeçar dhe një 16-vjeçar. 26-vjeçari dhe 17-vjeçari u vunë në pranga, ndërsa 16 vjeçari u procedua në gjendje të lirë, për veprën penale “Vjedhja”, kryer në bashkëpunim.
Po hetohet për të dokumentuar vjedhje të tjera që mund të kenë kryer këta shtetas“, thuhet në njoftim.
Materialet procedurale iu referuan Prokurorisë së Vlorës, për veprime të mëtejshme.
