Policia e Shkodrës ka arrestuar një person të shpallur në kërkim, pasi akuzohet se në muajin Maj të vitit e kaluar ka qëlluar me armë zjarri një të ri, duke e lënë të plagosur.
Në kuadër të operacionit të koduar “Time” është vënë në pranga shtetasi Gentian Mithi 47 vjeç, banues në Shkodër. Raportohet se në momentin e ndalimit, në rrugë, gjatë kontrollit fizik, atij i është gjetur një armë zjarri pistoletë me një krehër me fishekë.
“Ky shtetas ishte shpallur në kërkim pasi Gjykata e Shkallës së Parë e Juridiksionit të Përgjithshëm Shkodër i ka caktuar masën e sigurisë “Arrest në burg”, për veprat penale “Vrasja me paramendim”, mbetur në tentativë dhe “Prodhimi dhe mbajtja pa leje e armëve, armëve shpërthyese dhe i municionit”.
Gentian Mithi akuzohet se më datë 11.05.2024, në lagjen “Salo Halili”, ka qëlluar me armë zjarri, për motive të dobëta, në drejtim të shtetasit Jaser Osmani, 24 vjeç, i cili u dëmtua në këmbë.” – njofton Policia.
Materialet procedurale i kaluan Prokurorisë, për veprime të mëtejshme
Sherri për vijat e bardha
Ngjarja ka ndodhur rreth orës 16:00 të 11 majit 2024 në lagjen “Salo Halili”, ku Jaser Osmani u plagos pranë banesës së tij, ku mori një plumb në këmbë.
Dyshohet se autori i dyshuar dhe i plagosuri e kishin nisur konfliktin e tyre në qendër të Shkodrës, në lagjen “Parrucë”. Gjithçka ka nisur pas një debati mes tyre për kalimin në vijat e bardha në rrugë. 24 vjeçari i plagosur po ecte në këmbë duke tentuar që të kalojë në anën tjetër të rrugës pikërisht në vijat e bardha. Në atë moment autori i dyshuar ka qenë duke kaluar me automjet.
I plagosuri pretendonte se ishte e drejta e tij për të kaluar në rrugë, ndërsa autori i dyshuar pretendoi se duhej të kalonte ai me makinë. Palët kanë debatuar mes tyre.
Pas pak çastesh shtetasi Gentian Mithi dyshohet se ka shkuar në afërsi të banesës së 24 vjeçarit në lagjen “Salo Halili” në vendin e njohur si “Çinari i Tophanës” dhe aty mendohet se e ka plagosur me armë zjarri pistoletë dhe më pas është larguar në drejtim të paditur.
