Policia e Beratit ka proceduar në gjendje të lirë pesë persona për vepra të ndryshme penale. Një 58-vjeçar dyshohet se ka tregtuar produkte kozmetike pa faturë tatimore, ndërsa një 57-vjeçar ka kryer ndërtim të paligjshëm.
Ndërkohë një tjetër person ka dëmtuar me shufër hekuri nipin e tij 5 vjeç dhe një 40 vjeçar pas një zënke me komshiun i pret këtij të fundit disa rrënjë ullinj.
Policia thotë se këta persona po hetohen në gjendje të lirë.
Drejtoria Vendore e Policisë Berat
Specialistët e Seksionit për Hetimin e Krimeve Ekonomiko-Financiare referuan materialet në Prokurori, ku nisi procedimi në gjendje të lirë për shtetasin A. Y., 58 vjeç, banues në Berat, pasi nga kontrollet në automjetin që drejtonte dhe në dyqanin që administronte, u gjetën produkte kozmetike, pa fatura blerjeje.
Specialistët e Seksionit për Hetimin e Krimeve të Komisariatit të Policisë Kuçovë referuan materialet në Prokurori, ku nisi procedimi në gjendje të lirë për shtetasit:
-F. B., 57 vjeç, për veprën penale “Ndërtimi i paligjshëm”;
-P. S., 62 vjeç, banues në fshatin Zdravë, pasi ditën e djeshme, duke prerë disa shufra hekuri, në banesën e tij, ka dëmtuar lehtë, nga pakujdesia, nipin e tij 5 vjeç.
Specialistët e Seksionit për Hetimin e Krimeve të Komisariati të Policisë Skrapar referuan materialet në Prokurori, ku nisi procedimi në gjendje të lirë për shtetasin M. M., 40 vjeç, banues në fshatin Kakrukë, pasi dyshohet se si pasojë e një konflikti për motive pronësie, ka prerë disa pemë ulliri në pronësi të një shtetasi tjetër.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
