Sali Berisha ka mbledhur ditën e sotme Kryesinë e PD-së, ku në fokus të diskutimeve kanë qenë mëyra se si do të bëhen Primaret për të caktuar kandidatët për deputet në zgjedhjet parlamentare të 11 Majit.
Gjatë fjalës së tij, Berisha foli dhe në lidhje me votën e diasporës, ku kërkoi që kandidatët për deputet duhet të regjistrojnë secili nga 300 emigrantë për të votuar dhe se këtë duhet ta kenë të konfirmuar me “screenshot”.
Berisha tha se kanditatët janë të udhëzuar të përdorin të gjitha mundësitë që kanë, teksa sipas tij, kjo gjë do të jetë një investim shumë i madh për fitoren në zgjedhje.
Sali Berisha: Në Shqipëri është kuptuar qartë se dhe emigracioni dhe diaspora është me PD në tërësi, sigurisht, nuk mund të them këtë gjë, por në shumicë dërrmuese. Tani, jemi në fazën pothuaj përfundimtare të këtij procesi në emigracion dhe diasporë. Ndaj dhe sot që koincidon dhe me miratimin e të gjithë procedurave të kandidatëve për deputetë, mendoj që në këtë udhëzim që kemi, që do diskutojmë, të shtohet kërkesa që çdo kandidat për deputet, duke filluar nga dita e sotme të ketë si detyrë të regjistrojë 300 emigrantë, dhe ta dokumentojnë këtë me skrinshotet e regjistrimit të tyre që paraqesin për regjistrimin e këtyre emigrantëve, shqiptarëve jashtë vendit.
Kanditatët janë të udhëzuar të përdorin të gjitha mundësitë që kanë, por një këshillë e imja është, në arsyetimin tim është që rruga më e sigurtë për regjistrimin e tyre është puna në blloqe dhe lagjet e qyteteve dhe fshatrave tona. Gjetja e tyre, lidhja telefonike, inkurajimi i tyre, nuk përjashtohen fare takimet jashtë. Secili kandidat tani, ka të drejtë të zgjedhë vet formën më të sigurtë dhe më të suksesshme. Por çdo kandidat duhet të bëjë gjithçka për garantimin e 300 emigrantëve të regjistruar. Kjo, do të ishte një investim shumë i madh nga ana e kandidatit dhe e partisë për fitoren e ardhshme.
