Erion Veliaj ka reaguar për herë të parë pas arrestimit nga SPAK nën dyshimet se ka kryer korrupsion në bashkëpunim në 9 raste, teksa akuzohet edhe për “Pastrimi i produkteve të veprës penale ose veprimtarisë kriminale”.
Në një postim në rrjetet sociale, Veliaj sulmon prokurorin e SPAK, Ols Dado, të cilin e konsideron si një prokuror lunatik, idiot dhe një fyerje e gjallë e inteligjencës njerëzore, teksa akuzat e ngritura ndaj tij i quan si idiote
Veliaj deklaron më tej se tani nuk e ka më detyrimin të heshtë për çfarë i kanë parë sytë në sjelljen me familjen e tij dhe i kanë dëgjuar veshët nën çatinë e SPAK-ut. Ky duket si një mesazh jo vetëm për SPAK-un, por edhe politik, për “shefat” e tij në parti.
Sa i përket njoftimit të SPAK, ku zbërthente skemën e korrupsionit të tij, Erion Veliaj thotë se nuk ka asnjë lidhje me idiotësitë e shkruara në paçavuren, sipas tij, fatkeqësisht të sigluar edhe nga Altin Dumani, duke sulmuar indirekt edhe kreun e Prokurorisë së Posaçme.
Veliaj citon edhe një herë më tej se ai dhe familja e tij nuk kanë asnjë lidhje me korrupsionin, teksa shprehet i bindur se do t’i zbërthejë një e nga një, idiotësitë e asaj akuze.
“Më vjen keq për motrat dhe vëllezërit e Partisë Socialiste dhe për kryetarin, që pas kaq vitesh beteja të përbashkëta elektorale, nëse nuk do të më ketë në krah këtë fushatë, siç duket gjasat, përderisa më fusin në burg pa gjyq 3 muaj para zgjedhjeve.” – është mesazhi i Veliajt sa i përket zgjedhjeve të 11 Majit.
Në dosjen e Erion Veliajt, është caktuar masa e “Arrestit në shtëpi” dhe ndaj bashkëshortes së tij, Ajola Xoxa, si dhe është arrestuar biznesmeni shqiptaro-Elman Abule. Ndërkohë, 5 biznesmenët të tjerë, Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu ndodhet nën masën “detyrim paraqitje”.
Këta të fundit në këmbim të tenderave nga Bashkia e Tiranës dhe lejet e ndërtimit, i kishin Erion Veliajt para shuma monetare nëpërmjet blerjeve fiktive, sponsorizimeve, OJF-ve të Ajola Xoxës, si dhe pasurive të paluajtshme.
Reagimi i plotë i Erion Veliajt:
“Nuk më befason ky fund absurd i këtij kapitulli të gjatë zvarritjeje sa në gojët e qenërisë mediatike dhe sa në duart e një prokurori lunatik, që është një fyerje e gjallë e inteligjencës njerëzore. Por, ky ishte vetëm kapitulli i parë.
Tani unë nuk kam më detyrimin të hesht për çfarë më kanë parë sytë në sjelljen me familjen time dhe më kanë dëgjuar veshët nën çatinë e SPAK-ut. Kam respektuar, si gjithë të tjerët, vijën tonë politike, jo komente për një proces të hapur nga drejtësia.
Besomëni, nuk është e lehtë të heshtësh kur të djeg lëkura sikur të fikin bishta cigaresh në trup nga idiotësitë që të thotë një prokuror, si ai që nuk la dëshmitar pa shantazhuar. E kam bërë me besimin që kështu duhet dhe nuk pendohem që kam shtrënguar dhëmbët.
Nuk besoj se mediat do të kenë kurajon të zbërthejnë një më një akuzat idiote dhe më vjen tmerrësisht keq që disa sipërmarrës kanë hyrë në dorën e atij të padituri epsharak, për shkak se kanë sponsorizuar aktivitete kulturore për Tiranën.
Më vjen keq për Ajolën, që as djalin nuk e lanë të çojë e marrë nga shkolla, por edhe kjo nuk më befason.
Më vjen keq për nënën time, që zemër plasur në çdo betejë timen këto 20 vite, s’ju ndanë peripecitë prej një jete sakrificash.
Më vjen keq për të gjithë bashkëpunëtorët, kolegët, punonjësit e Bashkisë së Tiranës dhe dua ta dinë që nuk kam unë asnjë lidhje me idiotësitë e shkruara në paçavuren fatkeqësisht të sigluar edhe nga Altin Dumani.
Më vjen keq për motrat dhe vëllezërit e Partisë Socialiste dhe për kryetarin, që pas kaq vitesh beteja të përbashkëta elektorale, nëse nuk do të më ketë në krah këtë fushatë, siç duket gjasat, përderisa më fusin në burg pa gjyq 3 muaj para zgjedhjeve.
U them të gjithëve atë që i kam thënë kryetarit dhe kujt tjetër më ka pyetur: Nuk kemi asnjë lidhje unë dhe familja ime me fjalën korrupsion. Kjo historia jonë është aq tragjikomike sa njerëzit s’do ta besojnë kur t’i dëgjojnë të zbërthyera një e nga një, idiotësitë e asaj akuze. Nuk do të jetë e lehtë, se në këto kushte nuk shpjegohesh dot si do dhe sa do, por kam një besim të madh se e vërteta është më e fortë se sa çdo mur dhe se sa çdo idiot që i bëhet asaj barrikadë duke abuzuar me pushtetin e drejtësisë.”
SPAK: Veliaj u pasurua nga fondet e Bashkisë dhe lejet e ndërtimit. Luks i shfrenuar i Xoxës
Nga faturat fiktive tek vila në Qerret, SPAK zbërthen korrupsionin e Sulës, Fushës dhe Bektashit
