Vdekja e 13-vjeçares shqiptare, Aurora Tila, e cila tronditi opinionin publik në Itali, ka marrë fund me zbardhjen e të vërtetës pas autopsisë që ka zbuluar rrethana tronditëse.
Në fillim, u raportua se vajza kishte rënë nga tarraca e një pallati, por pas hetimeve të mjekëve të Institutit të Mjekësisë Ligjore të Universitetit të Pavia, është vërtetuar se Aurora nuk ishte vetëhedhur, por ishte shtyrë nga dikush.
Gazetarja Alba Kepi ishte këtë të enjte në një lidhje direkte për Euronews Albania ku tha se ditën e stome është mësuar se 13-vjeçarja është shtyrë nga i dashuri i saj.
“Është konfirmuar nga autopsia se Aurora Tili është shtyrë nga pallati i saj, nga një lartësi 7 metra. Kanë qenë familjarët e saj të cilët kanë rrëfyer se gjithçka mund të jetë kryer nga i fejuari (i dashuri) 15-vjeçar i vajzës. Sipas rrëfimit të familjarëve ai ka qenë shumë i dhunshëm, shumë posesiv, i dërgonte mesazhe me dhjetra herë në ditë dhe flinte poshtë pallatit të 13-vjeçares pasi ishte shumë xheloz ndaj saj”,-tha gazetarja Kepi.
Hetimet e kryera nga karabinierët e Piacenzës kanë zbuluar dëshmi të tjera të rëndësishme. Tre persona kanë dhënë informacione të ndryshme, ku dy prej tyre pretendojnë se kanë parë skenën e ngjarjes, ndërsa një i treti ka dëgjuar britmat e vajzës gjatë incidentit.
Dëshmitarët kanë pohuar se kanë parë Aurorën duke u mbajtur pas parmakut, ndërsa ish-i dashuri i saj, 15-vjeçar, e godiste atë me grushte për ta shtyrë të binte.
Përveç dëshmive të mbledhura, hetuesit kanë identifikuar dëmtime të dukshme në duar, veçanërisht në kyçet e gishtave, që mund të tregojnë përpjekje për të mbajtur ekuilibrin dhe për të mbrojtur veten.
Ish-i dashuri i Aurorës është arrestuar dhe akuzohet për vrasje me dashje, duke shkaktuar tragjedinë që mori jetën e vajzës në 25 tetor 2024, teksa ai vetë i mohon këto akuza.
