Në Prokurorinë e Posaçme është paraqitur sot Agim Deda, vëllai tjetër i Hekuran Dedës, i vrarë në protestën e 21 janarit 2011.
Kujtojmë që një ditë më parë, hetuesit e SPAK pyetën vëllanë tjetër të Dedës, Zabit Deda, i cili për mediat tha se ka shpresë që kjo ngjarje do zbardhet.
“Ato gjëra që na kërkuan ne i thamë. Besoj se 21 janari do zbardhet si ngjarje. SPAK kishte përparuar me hetimet. Po janë thirrur edhe vëllezër të tjerë për të dëshmuar. Shpresoj se kjo ngjarje do të zbardhet”, tha ai pasoi doli nga ambientet e SPAK ditën e djeshme.
Pas vrasjes së katër protestuesve në bulevard, vazhdojnë të pazbardhura pa autorë vrasja e Aleks Nikës dhe Hekuran Dedës.
Deri më tani mes dëshmive më të rëndësishme janë pyetur si deklarues i ish drejtorit të përgjithshëm të policisë në atë kohë në detyrë Hysni Burgaj, zëvendësi i tij Agron Kulicaj, drejtori i policisë së Tiranës Samir Muca.
Si edhe e Saimir Tahiri në cilësinë e ish drejtuesit politik të PS për Tiranës gjatë kohës kur u thirr protesta e 21 janarit, që u mbyll me katër protestuesit e vrarë.
Po ashtu ish komandanti Ndrea Prendi nuk është pyetur ende për 21 janarin, ndonëse ai ka qenë në këto ambiente siç rezulton ka dhënë deklarime për një tjetër dosje.
Për shkak se ish komandanti i Gardës rezulton së bashku me ish gardistin Agim Llupo, rezultojnë të dënuar për vrasjet e protestuesve Ziver Veizi e Faik Myrtaj, pozita e tij është më në vështirësi se e të tjerëve, kur të kalojnë pragun e prokurorisë.
Me një urdhër të Strasburgut që e ka vlerësuar 21 janarin me të vrarë Ziver Veizin, Hekuran Dedën, Aleks Nikën dhe Faik Myrtaj si një krim shtetëror, SPAK ka vlerësuar gjatë këtyre muajve dhjetëra veprime hetimore të prokurorisë së kryeqytetit, ku dhe ka vendosur që disa prej dëshmive ti administrojë ballë për ballë.
