Janë zbardhur detaje të reja nga ndalimi i 24-vjeçarit Ariel Rraja, djali i Flamur Rrajës dhe nipi i ish-deputetit socialist Rrahman Rraja. Ai ishte në kërkim pasi Gjykata e Tiranës i ka caktuar masën e sigurisë “arrest me burg” për veprën penale “Largimi i të burgosurit nga vendi i qëndrimit”.
Por, burime bëjnë me dije se operacioni i Policisë së Tiranës ka hasur në kundërshtinë e Flamur Rrajës (babai i Ariel Rrajës) dhe Ermal Tufës, duke i kërcënuar me fjalës “Mos hyni në zonën tonë”.
Pavarësisht “kërcënimit” që kanë marrë nga Rrajat, efektivët e Tiranës e kanë ekzekutuar operacionin, ku aty kanë pikasur edhe 24-vjeçarin. Flamur Rraja dhe Ermal Tufa u proceduan penalisht në gjendje të lirë, pasi kanë kundërshtuar punonjësit e Policisë dhe nuk iu janë bindur urdhrit të tyre, për shoqërimin në komisariat.
Ariel Rraja akuzohet për ngjarjen e ndodhur më 24 Tetor, ku së bashku me babain e tij, Flamur Rraja kanë dhunuar Kujtim Cacën dhe familjarët e tij, pas një konflikti për çështje pronësie. Ngjarja u mbajt e fshehtë nga ana e Policisë në atë kohë, teksa pas dy ditësh u raportua në media.
Ndërkohë, në momentin kur ka shkuar për të dhunuar Kujtim Cacën, 24-vjeçari ndodhej në masën “Arrest shtëpie”, pasi ishte arrestuar më herët për shkak se u kap me rreth 50 gramë kokainë në automjet gjatë një kontrolli policor
Ndërsa babai i tij, Flamur Rraja ka qenë dhe pjesë e dhunës së ushtruar ndaj pjesëtarëve të familjes Maja, ku dhe atëherë u shpall në kërkim. Në atë ngjarje, ku pamjet e transmetuara tronditën opinionin publik, Flamur Rraja shfaqej me një send në dorë, të dyshuar pistoletë, por më pas dosja e atij dhunimi i “shfry” nga drejtësia.
