Policia e Krujës ka arrestuar Flamur Rrajën, vëllain e ish-deputetit socialist Rrahman Rraja.
Lajmi konfirmohet nga burime për mediat pranë uniformave blu, teksa ende nuk ka njlë komunikatë zyrtare nga ana e Policisë.
Flamur Rraja ishte shpallur në kërkim, pasi akuzohet se bashkë me të birin Arjel Rraja kanë dhunuar pjesëtarët e një familje.
Ngjarja ka ndodhur më 24 Tetor, teksa Flamur Rraja dhe djali i tij, Arjel Rraja kanë dhunuar Kujtim Cacën dhe familjarët e tij, pas një konflikti për çështje pronësie. Ngjarja u mbajt e fshehtë nga ana e Policisë, teksa pas dy ditësh u raportua në media.
Ariel Rraja ka qenë arrestuar një vit më parë, në tetor, pasi u kap me rreth 50 gramë kokainë në automjet gjatë një kontrolli policor, ndërsa i ati Flamur Rraja ka qenë dhe pjesë e dhunës së ushtruar ndaj pjesëtarëve të familjes Maja, ku dhe atëherë u shpall në kërkim.
Në atë ngjarje, ku pamjet e transmetuara tronditën opinionin publik, Flamur Rraja shfaqej me një send në dorë, të dyshuar pistoletë, por më pas dosja e atij dhunimi i “shfry” nga drejtësia.
