Janë dorëzuar në Drejtorinë e Policisë së Shkodrës, Izmir Sakica dhe Samuel Troshani, të dyshuar si të përfshirë në masakrën me 4 të vrarë të regjistruar pasditen e 30 Tetorit 2024 në afërsi të Dobraçit.
Pas disa muajsh në kërkim, Sakica dhe Troshani kanë vendosur të vetëdorëzohen pranë autoriteteve policore, të shoqëruar dhe nga avokati i tyre, Sokol Tahiraj.
Pas atenatit me 4 vitkima, uniformat blu kanë ushtruar kontroll në banesat e tyre për t’i shoqëruar në Polici për t’i marrë në pyetje rreth ngjarjes, por në atë kohë ata nuk janë gjetur.
Gjithsesi, ndaj tyre nuk ka zyrtarisht ndonjë masë sigurie të lëshuar, teksa ata ishin në kërkim dhe për një tjetër ngjarje të ndodhur më herët më 23 gusht 2024 në Bushat të Shkodrës, ku dyshohet se ka pasur shkëmbim zjarri mes tyre dhe dy vëllezërve Andrea e Aleksandër Prendi.
Zyrtarisht ata ishin shpallur në kërkim vetëm për dhunimin me sende të forta të Vladimir Bruçit, ngjarje kjo e ndodhur më 3 Qershor të vitit 2024 në rrugën “Pogej” të lagjes Rus.
Për këtë ngjarje, Policia e Shkodrës në ate kohë arrestoi vetëm Edmond Sakicajn, teksa shpalli në kërkim shtetasit Izmir Sakicaj, Samet Halluni, Arlind Kajoshi, Samuel Troshani, dhe Alban Bruçi. Shkaku i konfliktit mes tyre ka qenë për vendparkimin e automjeteve.
Ndërkohë, në atentatin e regjistruar më 30 Tetor, humbën jetën vëllai i Ibrahim Licit, Hamza Lici, Arlind Bushati, si dhe dy viktimat aksidentale çifti Bashkim dhe Flutura Basha, të cilët u përplasën nga makina e viktimave teksa udhëtonin me motor.
Në automjetin e viktimave dyshohej se ishte i pranishëm edhe Ibrahim Lici, i shpallur në kërkim prej vitesh, por deri më tani kjo gjë nuk është konfirmuar zyrtarisht.
Masakra me 4 të vrarë e Dobraçit po hetohet nga Prokuroria e Posaçme, për shkak se Prokuroria e Shkodrës ka shpallur moskompetencë, pasi dyshohet se është kryer nga një grup i strukturuar kriminal.
