Policia e Durrësit ka arrestuar një person të shpallur në kërkim, i cili akuzohet për një vrasje të mbetur në tentativë.
Në kuadër të operacionit të koduar “Distanca” është vënë në pranga shtetasi Klenis Kazazaj, 30 vjeç, banues në Durrës, i cili është kapur në lagjen nr. 13 të qytetit bregdetar.
Autoritetet raportojnë se Kazazaj ishte shpallur në kërkim pasi Gjykata e Fierit, me vendimin e datës 4 Gusht 2023, i ka caktuar masën e sigurisë “Arrest në burg”, për veprat penale ”Vrasja me dashje”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”.
30-vjeçari dyshohet se më datë 30 Korrik 2023, në lagjen “Sheq i madh”, Fier, pas një konflikti të çastit për motive të dobëta, ka tentuar të vrasë me armë zjarri shtetasin Orges Buzi, 34 vjeç, banues në Fier, i cili mbeti i plagosur.
Blutë e Durrësit bëjnë me dije se veprimet e tjera procedurale për këtë shtetas do të kryhen nga Policia e Fier. Materialet procedurale i kaluan Prokurorisë, për veprime të mëtejshme.
