Është arrestuar sërish nga policia Gleard Gusholli, i cili u kap nga uniformat blu duke shpërndarë drogë, ndërkohë që ishte me masë sigurie arrest në shtëpi.
Sipas Policisë, Gleard Gusholli, së bashku me një 24-vjeçar u kap nga duke transportuar drogë. Lënda narkotike (kokainë) u gjet në makinë që drejtohej nga 35-vjeçari.
“Komisariati i Policisë Nr. 2, bazuar në informacionet e siguruara në rrugë operative, për një rast të shitjes së drogave të forta, në doza, ka organizuar dhe finalizuar operacionin policor të koduar “Next”, si rezultat i të cilit u vunë në pranga shtetasit: G. G., 35 vjeç dhe F. P., 24 vjeç, të dy banues në Tiranë.
Në rrugën “Naim Frashëri”, shërbimet e Policisë kanë ndaluar automjetin me drejtues shtetasin G. G. dhe pasagjer shtetasin F. P. Gjatë kontrollit të automjetit u gjet një pako me lëndë të dyshuar narkotike kokainë (me peshë 24 gramë), të cilën dyshohet se këta shtetas e posedonin me qëllim shitjen në doza.
Nga verifikimet e kryera për rastin rezultoi se shtetasi G. G. kishte thyer masën e sigurisë “Arrest në shtëpi”, caktuar nga Gjykata, për veprën penale “Dhuna në familje””, thuhet në njoftimin e policisë,
Po kush është Gleard Gusholli?
35-vjeçari Gleard Gusholli është një emër jo pak i dëgjuar për autoritetet e vendit tonë. Një vit më parë, ai u bë viral pasi mbajti peng në banesë, bashkëjetuesen e tij. Pasi e dhunoi për të paktën një javë rresht, e reja në atë kohë ia doli të njoftonte familjarët dhe blutë.
Edhe pse i arrestuar për pengmarrje dhe dhunë në familje, Gusholli, në rrethana të paqarta, doli nga qelia në arrest shtëpiak.
Dhe kjo nuk e pengoi aspak atë, që të vijonte aktivitetin kriminal në shpërndarjen e lëndëve narkotike në kryeqytet.
Një natë më parë, nga ana e Komisariatit të Policisë nr.2 Tiranë, mbi bazën e të dhënave të grumbulluara në rrugë operative për kapjen e personave që shperndajnë lënde narkotike të llojit kokainë, u finalizua me sukses operacioni policor i koduar “Blloku 21” ku u bë e mundur arrestimi në flagrancë i Gliard Gusholli dhe Frenkli Permarkaj.
Gjatë operacionit u sekuestruan në cilësinë e provës materiale: 4 qese me lëndë të dyshuar kokainë me peshë të përgjithshëm 23 gram, 2 aparate celularë, 1 automjet i tipit Mercedez Benz.
Tashmë Gleard Gusholli duhet të përballet me ligjin edhe për dy vepra të tjera penale. Atë të “largimit nga banesa” apo thyerjen e arrestit shtëpiak dhe prodhimin dhe shitjen e lëndëve narkotike.
