Detaje të reja janë mësuar nga ngjarja e rëndë që tronditi Tiranën mbrëmjen e djeshme, teksa biznesmeni 56-vjeçar Bujar Nasufi u qëllua për vdekje me armë zjarri në derën e shtëpisë së tij në zonën e ‘Pallatit me Shigjeta’ në kryeqytet.
Sipas A2CNN, konfliktet brenda rrethit familjar është pista kryesore e hetimit të policisë në lidhje me ekzekutimin e 56-vjeçarit.
Hetuesit kanë arritur që të sekuestrojnë disa kamera sigurie ku duket autori i krimit, i cili me kapuç është munduar që të fshehë identitetin e tij. Madje autori ka qenë duke e pritur viktimën në afërsi të banesës.
U mësua se 56-vjeçari u ekzekutua në sy të bashkëshortes së tij. Kjo e fundit ishte brenda mjetit në momentin kur autori u afrua dhe e qëlloi shënjestrën duke e lënë të vdekur në vend.
Kanë qenë dy automjete, një e viktimës dhe tjetra e vëllait të tij që kanë qenë duke u afruar në banesë. Të dyja familjet jetojnë në një godinë, pallat që e kanë ndërtuar para disa vitesh.
Fillimisht në rrugicë është futur mjeti i të vëllait, ndërsa pas ka qenë mjeti i viktimës. Sapo ky i fundit ka dashur të parkojë në rrugë, autori është afruar dhe e ka qëlluar dhe më pas është larguar me motor.
