Drejtuesi i Lëvizjes Bashkë, Arlind Qori reagoi për herë të parë pas përplasjes së djeshme me Blendi Fevziun. Në një video-mesazh, Arlind Qori thotë se pavarësisht se dikush mund të mendojë se nuk “duhet përmendur litari në shtëpinë e të varurit”, përplasja ishte e pashmangshme.
Qori thotë se po mbronte gazetarët dhe të drejtat e tyre nga censura e pronarëve të televizioneve, ndryshe nga ç’pretendoi Blendi Fevziu, ndërsa për këtë të fundit tha se e prishi qëllimisht emisionin ose për klikime, ose për shkak të nevojës për të mbrojtur televizionin.
Në fund të mesazhit, ai i fut edhe nga një “kunjë” kryetarëve të partive të tjera të reja prezente në studio, Agron Shehajn, Endri Shabanin, Adriatik Lapajn, duke thënë se mbajtën krahun e Blendi Fevziut, me shpresën se do të ftohen sërish në emision.
“U fol në emision për atë që nuk mund të mos flitej. Për raportin midis oligarkisë ekonomike, pushtetit të korruptuar dhe mediave të kapura. Dikush mund të thotë se nuk bën të përmendësh litarin në shtëpinë e të varurit, por unë mendoj se të thiuash të vërtetën me çdo kusht, pavarësisht censurës dhe dhunës verbale është detyrim jo vetëm politik por edhe qytetar. Po përpiqesha t’i jepja përgjigje pyetjes lidhur me aleancën me partitë e tjera, por drejtuesi i emisionit ndoshta e mori si sulm personal atë që ishte kritikë për institucionin ku ai punonte Tv KLAN.
Drejtuesi i emisionit vendosi mos të bënte më emision por po më akuzonte se si politikanët e vjetër po sulmoja gazetarët. Në fakt qëndrimi ishte më pro të drejtave të gazetarëve në daljet publike sepse po mbroja gazetarët nga presioni për vendin e punës, censura që ushtrojnë pronarët e tyre oligarkë, ndërtues të mëdhenj. Nga ana tjetër nuk mund të mos shpreh keqardhjen për mungesën e solidaritetit nga kolegët e partive të tjera aty në panel. Mu duk sikur donin ti bënin qejfin drejtuesit të emsionit apo pronarit të televizionit, mbase për të marrë ndonjë ftesë më shumë”, u shpreh Qorri ndër të tjera në videon e tij.
