Belinda Balluku ka dhënë mbrëmjen e djeshme një intervistë propagande në median, ku ish parardhërsi i saj në postin e zv.kryeministrit, Arben Ahmetaj, e ka konsideruar atë si drejtoreshë editorioale të atij televizioni.
Balluku foli gjerë e gjatë në intervistë për arritjen historike të çmimit të energjisë me plot 1 lekë, edhe pse Shqipëria vazhdon ta ketë çmimin e energjisë më të lartin në rajon.
Gjatë intervistës nuk munguan as ankesat e Ballukut, për të justifikuar vjedhjet e KESH me shit-blerjen e energjisë. Ajo deklaroi se ideja se energjia vjen vetëm nga burimet ujore është një perceptim i gabuar, pasi sipas saj, prodhimi i energjisë ka kosto shumë të lartë.
“Ka një problem të madh në mënyrën si e shohim energjinë. Shumëkush mendon se energjia që vjen kur ndezim dritën varet vetëm nga uji, por kjo nuk është e vërtetë. Kostoja e prodhimit të saj është shumë e lartë dhe një pjesë të barrës financiare e mbulon KESH,” tha Balluku.
Kujtojmë se Belinda Balluku është kallëzuar në SPAK nga Partia Demokratike, pasi pretendohet se vetëm për 1 vit abuzimi me shit-blerjen e energjisë elektrike ka shkuar në mbi 180 milion euro.
Sipas demokratëve, Balluku, me veprimet dhe mosveprimet e saj, ka lejuar që energjia elektrike të shitet me humbje jashtë tregut të Bursës, në kundërshtim me ligjin dhe vendimet në fuqi, duke vjedhur hapur qytetarët shqiptarë dhe duke favorizuar 4-5 kompani pranë saj.
“KESH ka shkelur ligjin vitin e kaluar dhe deri në këtë moment që flasim, pasi nuk e ka nxjerrë energjinë e pa kontraktuar në Bursë, por e ka blerë shtrenjtë dhe e ka shitur lirë tek kompani private seksesere të shitblerjes së energjisë elektrike.” – ka deklaruar Gazment Bardhi kur sqaroi kallëzimin e PD-së.
Ditën e djeshme prokurorja e SPAK, Anita Jella deklaroi se ka nisur një procedim penal për çështjen në fjalë për akuzën e shpërdorimit të detyrës.
