Policia e Tiranës ka identifikuar prej mbrëmjes së djeshme të riun, i cili kishte marrë me qira apartamentin, ku u ngujua mesditën e djeshme, 21-vjeçarja Sajma Q. në zonën e Astirit dhe telefonoi autoritetet me pretendimin se po dhunohej nga disa persona.
Lajmi konfirmohet nga burime për media, teksa mësohet se ai është i dashuri i vajzës që u ngujua në apartament. Mësohet se pas kqyrjeve të kamerave të sigurisë nga blutë e kryeqytetit, ai dallohet duke u larguar nga zona e pallitit ku ndodhi ngjarja me një automjeti tip “Audi Q7” të zi me targa angleze.
Burime bëjnë me dije se Sajma Q. punonte në një lokal të njihur nate në zonën e Astirit, ku dhe ishte njohur me të dashurin e saj dhe frekuentoheshin bashkë prej disa kohësh.
Policia e Tiranës po punon për ta lokalizuar të riun dhe për ta shoqëruar në komisariat për ta pyetur rreth ngjarjes. Mësohet se ai kishte marrë me qira ditore jo vetëm apartamentin ku u gjet vajza e ngujuar, por edhe apartamentin përballë.
Sipas dëshmisë së vajzës së ngujuar, ajo ndodhej aty dhe me dy vajza të tjera dhe me tre djem, ku kishin kaluar gjithën natën, para se të ndodhte ngjarja e ngujimit.
Kujtojmë se telefonata e vajzës në sallën operative të Policisë së Shtetit, ndodhi rreth orës 14:00 të ditës së djeshme dhe tha se ishte dhunuar nga disa persona brenda një apartamenti. Por, kur uniformat blu mbërritën në vendin e ngjarjes, vajza Sejma Q. nuk pranoi ta hapte derën, madje edhe pas negociatave me prindërit e saj, të cilët shkuan në ndihmë të Policisë.
Kjo solli që forcat RENEA të ndërhynin nga ajri, ku u lëshuan me litar nga tarraca e pallatit dhe u futën që nga ballkoni dhe dritarja e apartamentit dhe më pas hapën derën. Vajza është konstatuar e vetme në apartament në gjendje të rënduar psikologjike, teksa sipas Policisë së Tiranës, nga kqyrja fizike nuk janë konstatuar shenja dhune.
Uniformat blu kanë ushtruar kontroll edhe në apartament përballë apartamentit ku ndodhej vajza e ngujuar dhe aty kanë gjetur dy armë zjarri pistoletë. Burime për mediat bëjnë me dije se dhe sipër tavolinës janë konstatuar mbetje lënde narkotike kokainë.
Të dy apartamentet ishin marrë me qira nga i dashuri i vajzës së ngujuar, por uniformat blu nuk kanë konstatuar person tjetër brenda banesat, përveç saj.
