“Terrori i Kurtit nuk ka fund, Serbia do të jetë gjithmonë me popullin e saj”. Me këto fjalë kryeministri serb Millosh Vuçeviç reagoi për mbylljen e degës së Administratës Tatimore në Mitrovicën e Veriut. Por sipas tij, edhe kjo lëvizje e Kurtit nuk do t’i thyejë serbët.
“Sikur të mos i mjaftonin veprimet e tij të mëparshme, të drejtuara kundër serbëve, për tua vështirësuar jetën normale, qëndrimin dhe mbijetesën, në ditën e dytë të Krishtlindjeve vazhdoi me veprimet dhe provokimet e dhunshme”, tha Vuçeviç në një deklaratë.
Ndërkohë e ashtuquajtura Zyra për Kosovën në qeverinë serbe, tha se mbyllja e institucioneve të tjera në veri është tregues se Kurti nuk do normalizim apo bashkëjetesë paqësore, por ndryshim të dhunshëm të strukturave etnike, veçanërisht në veri, dhe mbretërim të terrorit.
Në deklaratë thuhet se mosveprimi i bashkësisë ndërkombëtare është shqetësues. Zyra për Kosovën ngre pyetjen nëse perëndimi po i mbron veprimet e Kurtit duke mos reaguar e duke qenë të pranishëm në terren gjatë aksioneve policore.
