Kryeministri Edi Rama vazhdon të tallet me shqiptarët.
Pas “rritjes” 4 mijë lekë të pensioneve, tashmë Edi Rama dhe numri dy i qeverisë së tij, Belinda Balluku vazhdojnë të tallen jo vetëm me të moshuarit por edhe me shtresën e mesme në vendin tonë.
Dyshja Rama-Balluku në çdo dalje nga mëngjesi në darkë po propagandonin për ulje “imagjinare” të energjisë elektrike, por e gjithë rezultoi një farsë e vërtetë.
Enti Rregullator i Energjisë miratoi sot çmimet e reja të energjisë për familjarët sipas aplikimit të bërë nga Furnizuesi i Shërbimit Universal pjesë e OSHEE.
ERE ka vendosur që të ulë me 1 lekë për kilovat çmimin e energjisë elektrike për periudhën nga 1 shkurti 2025 në 31 dhjetor 2025.
Çmimi i energjisë elektrike shkon 8.5 lekë/kilovat për familjarët që konsumojnë deri në 700 kilovat, kurse me vlerën 9.5 lekë do te faturohet për diferencën mbi 700 kilovat.
Çmimi aktual që paguajnë familjet shqiptare për energjinë është 9.5 lekë, pa TVSH apo 11.4 lekë me TVSH. Pra çmimi i energjisë elektrike ulet me 1 lekë, kështu familjet shqiptare do të paguajnë 10.2 lekë me TVSH nga 11.4 lekë që është aktualisht.
Për të dëshmuar sa qesharake është kjo ulje e energjisë elektrike, mjafton të japim një shembull se për një faturë rreth 30-40 mijë lekë të vjetra, ulja është rreth 3-4 mijë lekë. Ndërsa përfituesi më i “madh i uljes” është konsumatori që harxhon rreth 700 kilovat, e përkthyer në faturë ulja maksimale shkon rreth 7 mijë lekë të vjetra.
Për një ulje të tillë, Edi Rama dhe qeveria e tij kanë propaganduar 3 muaj radhazi, ndërsa realiteti është krejt i kundërt pasi konsumatori shqiptar paguan çmimin më të shtrenjtë të energjisë në rajon.
- Rama e quan historike uljen 1 lekë të energjisë elektrike
Kryeministri Edi Rama e quajti uljen e parë në historinë e 35 viteve të çmimit të energjisë elektrike, vendimin e kësaj të mërkure nga Bordi i Entit Rregullator të Energjisë.
Por këtë ulje të turpshme, Rama e justifikoi duke deklaruar se Shqipëria ul çmimin e energjisë në një kohë kur Rajoni dhe Evropa e ka rritur.
Sipas Ramës, tashmë synimi i qeverisë është kthimi i vendit në eksportues neto brenda mandatit të katërt.
“Ulja e parë në historinë e 35 viteve të çmimit të energjisë elektrike, ky është një fakt i cili tregon se në çfarë humnere jemi ngjitur në këtë pikë, ulja e çmimit është në kundër tendencë të plotë me rajonin dhe kontinentin ku jetojmë ku çmimi i energjisë jo vetëm është rritur por kërcënuar nga rritje të tjera, kjo masë është një masë më shumë se sa e mirëmenduar, e diskutuar gjerë në të gjithë nivelet me ekspertizën e brendshme dhe ndërkombëtare, e bazuar në projeksionet e planit tonë strategjik dhe kthimin në eksportues neto brenda mandatit të katërt.
Duke pasur parasysh parimin e shpallur botërisht të qeverisë për të ndarë me qytetarët frytet e reformave të dhimbshme, e përpjekjeve të mundimshme në këto vite dhe të një rritjeje ekonomike që për 2025 e parashohim në harkun e 4% që është një shifër shumë domethënëse. Histori 10 vjeçare përpjekjesh, kini parasysh disa fakte. Fakte qe nuk dalin zakonisht në ekran dhe portal se janë më shumë të interesuar për spektaklin e gjysmë të vërtetave”, tha Rama.
- Bardhi: Rama tallet me shqiptarët, ne paguajmë çmimin më të lartë në rajon
Kreu i Grupit Parlamentar të Partisë Demokratike, Gazment Bardhi ka komentuar vendimin e qeverisë për uljen e çmimit të energjisë elektrike me 1 lekë.
Në një postim në Facebook, Bardhi shkruan se kryeministri Edi Rama vazhdon të tallet me shqiptarët, pasi sipas tij ende kemi çmimin më të lartë të energjisë në rajon.
Bardhi shprehet se Rama sa herë që ka zgjedhje bën sikur ul për qëllime “mashtrimi elektoral” atë që sipas tij në fakt e ka rritur po vetë sa herë përfundojnë zgjedhjet.
“Edi Rama vazhdon të tallet me shqiptarët. Pasi e rriti çmimin e enrgjisë me 30 përqind, duke patur çmimin më të lartë në Rajon, sot quan historike që e ul me 1 lek për kilovat, por ndërkohë mbetemi përsëri vendi me çmimin më të lartë të energjisë se Kosova, Mali i Zi apo Bosnje Hercegovina!
Edi Rama mendon se qytetarët shqiptarë ushqehen 1 herë në çdo 4 vjet, paguajnë për energjinë elektrike 1 herë në çdo 4 vjet, apo marrin ilaçe 1 herë në çdo 4 vjet. Prandaj sa herë që ka zgjedhje bën sikur ul për qëllime mashtrimi elektoral atë që në fakt ka rritur po vetë sa herë përfundojnë zgjedhjet.
Ishte Edi Rama që rriti për 10 vjet çmimin e energjisë nga 7.4 lekë në 9.5 lekë, që Belinda Balluku të kishte më shumë të ardhura për të vjedhur me tendera dhe duke shitur më lirë e blerë më shtrenjtë energji jashtë Bursës së Energjisë, ndërkohë që sot thotë se është ditë historike që do bëjmë sikur ulim çmimin me 1 lek vetëm për 10 muaj sa të kalojmë zgjedhjet!
Ulja e çmimit të energjisë nuk duhet të jetë masë vetëm për 10 muaj, apo masë për mashtrim elektoral, por një masë e përhershme veçanërisht për familjet në nevojë apo me të ardhura mesatare. Sot shqiptarët për shkak të abuzimeve të Edi Ramës dhe Belinda Ballukut në sektorin e energjisë paguajnë cmimin më të shtrenjtë të energjisë krahasuar me vendet që blejnë energji nga Shqipëria. Për ilustrim në Kosovë çmimi mesatar i energjisë për konsumatorët familjar është 7 lekë për kilovat.
Shqiptarët tashmë e kanë kuptuar se Edi Ramës nuk i intereson as varfëria dhe as mirëqenia e qytetarëve. Edi Ramës i intereson vetëm pasurimi dhe mirëqenia e vetes, Belindës dhe një grushti të vogël oborrtarësh të tij”, shkruan Bardhi, teksa poston tabelen me poshtë: / Boldnews.al
