Zyra për Kosovën e Qeverisë së Serbisë, e drejtuar nga Marko Gjuriq, ka njoftuar se është vendosur që gjatë Kampionatit Evropian të Karatesë, i cili do të mbahet në Novi Sad (10-13 maj), Kosova nuk do të shfaqë simbolet e saj.
“Në mbledhjen e Ekipit koordinues të Qeverisë së Serbisë është arritur në përfundim që simbolet e statusit të Kosovës, në prag të garës dhe gjatë garës, nuk guxohet që të shpërfaqen në fushën sportive dhe përqark saj”,thuhet në komunikatën e Zyrës për Kosovën.
Në komunikatë vazhdohet së thënuri se, Kosova është lejuar të marrë pjesë në këtë garë nga organizuesi i garës, por diçka e tillë mund të bëhet në mënyrë neutrale vetëm përmes statusit.
“Do të përfaqësohen me emër dhe mbiemër dhe me stemën e Federatës së Karatesë së Evropës”, është thënë në komunikatë, duke shtuar se Ekipi koordinues në këtë mënyrë “e shmang mundësinë që një manifestim ndërkombëtar sportiv të keqpërdoret për promovimin e separatizmit dhe shkeljes të së drejtës ndërkombëtare”.
Më herët sot, përfaqësuesit e Federatës së Karatesë së Kosovës kanë deklaruar se do të udhëtojnë për në Novi Sad, por në rast se Kosova nuk do të trajtohet sikurse vendet e tjera pjesëmarrëse, nuk do të garojnë fare.
