Rreth 7 ton kokainë janë sekuestruar në Spanjë, njoftoi policia vendase, duke e quajtur këtë sasinë më të madhe të këtij lloji deri më sot.
Teksa sasi më të mëdha të drogës janë sekuestruar edhe më herët, kjo është ngarkesa më e madhe që është kontrabanduar në Spanjën jugore duke përdorur gomone të shpejta, të njohura në vend si “narko-lança”.
Policia tha se operacioni u zhvillua në orët e para të 27 dhjetorit, kur policia zbuloi dy varka të dyshimta me shpejtësi të lartë pranë lumit Guadalquivir.
Duke përdorur mbikëqyrje ajrore, detare dhe tokësore, autoritetet gjurmuan varkat teksa nga ato shkarkoheshin sasi të mëdha ngarkesash. Pakot më pas u transportuan në një pronë rurale të ruajtur në provincën e Seviljes.
Gjatë një bastisjeje të mëvonshme në pronë, policia zbuloi dy kontejnerë të magazinimit nëntokësor të krijuar për të fshehur dhe mbrojtur ngarkesat e paligjshme.
Përveç 7 tonëve kokainë, oficerët sekuestruan tre armë zjarri, përfshirë një pushkë sulmi AK-47 si dhe dy automjete të vjedhura. Tre persona janë arrestuar, por hetimet janë ende aktive.
Policia thotë se ky operacion ishte një goditje e rëndësishme për rrjetet e trafikut të drogës që vepronin përgjatë lumit Guadalquivir, i cili mbetet një pikë kyçe hyrëse për lëndët narkotike në Evropë.
Ky aksion vjen gjithashtu vetëm disa javë pas një konfiskimi tjetër historik. Në nëntor, autoritetet spanjolle njoftuan sasinë më të madhe të kokainës në historinë e vendit, një sasi të paprecedentë prej 13 tonësh, të kontrabanduar në një ngarkesë me banane nga Ekuadori.
Para kësaj, konfiskimet më të mëdha ishin 9.4 tonë në vitin 2023 dhe 8.7 tonë në vitin 2018. Sipas një analize nga “InSight Crime”, Spanja në vitin 2023 u identifikua si pika kryesore e hyrjes së kokainës në Evropë, bazuar në vëllimin e konfiskimeve të drogës.
