Policia kufitare e doganës së Kakavijës ka arrestuar dy persona të shpallur në kërkim nga drejtësia shqiptare.
Autoritetet raportojnë se në pranga është vënë shtetasi Dorjan Deda, 26 vjeç, banues në Tiranë. Gjykata e Tiranës e ka dënuar këtë shtetas, me 3 vjet e 4 muaj burgim, për veprën penale “Plagosja e rëndë me dashje“, kryer në bashkëpunim.
Gjithashtu, në pranga është vënë dhe shtetasi Landi Lezi, 46 vjeç, banues në fshatin Vasjar të Memaliajt.
Sipas autoriteteve, ky shtetas ishte shpallur në kërkim nga Stacioni i Policisë Memaliaj për veprën penale “Largimi i të burgosurit nga vendi i qëndrimit”, pasi kishte thyer masën e sigurisë “Arrest në shtëpi”, të vendosur nga GJKKO për veprat penale “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Veprimet e tjera procedurale për këta shtetas do të kryhen nga Policia e Tiranës dhe nga Stacioni i Policisë Memaliaj.
