Në atentatin e regjistruar mbrëmjen e të mërkurës në Vlorë ndaj Kevin Hajrullës, mbeti i plagosur aksidentalisht edhe 35-vjeçari Armand Spahiu, i cili ndodhej në vendin e tij të punës në një dyqan fruta-perimesh.
Ai mori një plumb në këmbë, teksa pas marrjes së mjekimit në spital, tani ndodhet në banesën e tij.
Në një prononcim për gazetarët, Spahiu tregon ato pak momente të tmerrit, ku thotë se fillimisht ka menduar se kanë qenë fishekzjarre dhe është shtrirë përtokë.
Ai shprehet se kur kanë mbaruar krismat është ngritur, ka marrë një ujë në një tabakino dhe aty ka parë se është plagosur në këmbë . Armand Spahiu thotë se dy efektivë të policisë pas ngjarjes e kanë çuar në spital.
“Unë isha në punën time. Nuk mora vesh asgjë ca ndodhi. unë mendova se ishin fishekzjarre. Pastaj u shtrita në shesh. Kur mbaruan krismat, u ngrita në këmbë, mora një bidon ujë dhe u ula të qetësohesha. Kur u ula pash që isha plagosur. Mora në telefon një efektiv policie dhe i thash që isha plagosur. Më morën me makinë policie e më çuan për mjekim. Në fillim unë mendova se ishin fishekzjarre. Plagosjen nuk e ndjeva në fillim, pas 10 minutash e ndjeva”, tha Spahiu.
35-vjeçari tregon se çdo ditë punon si shitës tek dyqani i fruta-perimeve tek një njeriu i tij. Ai thotë se punon për të mbajtur familjen kundrejt një page prej 2500 lekësh të reja në ditë. Siç tregon edhe vetë është e vetmja rrogë që ka në shtëpi, me të vetmet të ardhura që mbahet familja e tij. Në spital ka marrë ndihmën mjekësore dhe ka dalë me dëshirën e tij.
I pyetur nëse ka ndonjë mesazh për dike, Armand Spahiu tha: “Mesazhi im ëhstë vetëm falenderim për Zotin lart që më la të jetoj”.
