Një ngjarje e rëndë është regjistruar pasditen e kësaj të mërkure në Tiranë, ku dy persona kanë humbur jetën si pasojë e asfiksimit nga rrjedha e gazit në banesë.
Viktimat janë shtetasit Altin Maksuti rreth 47 vjeç dhe Vladimir Bengu rreth 56 vjeç, teksa ngjarja ka ndodhur rreth orës 17:20, në rrugën “Marije Kraja”.
“Dyshohet se janë asfiksuar nga rrjedhja e gazit, pronari i banesës, shtetasi A.M, rreth 47 vjeç dhe një afërm i tij i largët shtetasi V.B, rreth 56 vjeç, të cilët kanë humbur jetën sipas konfirmimit të stafit mjekësor.” – thuhet në njoftimin e Policisë.
Burime për mediat bëjnë me dije se Altin Maksuti jetonte me familjen e tij në Greqi dhe prej disa kohësh ishte kthyer i vetëm për të rikontruktuar banesën në Tiranë.
Familjarët e tij kanë tentuar të komunikojnë me të në telefon, por ai nuk iu përgjigjej dhe më pas kanë bërë denoncim në Polici.
Pasi kanë shkuar në banesë dhe kanë hapur derën i kanë gjetur të dy të pajetë me ngrohësen e gazit të ndezur. Dyshohet se dy viktimat kanë qenë në gjumë dhe e kanë harruar ngrohësen ndezur.
Nuk dihet saktësisht nëse ata kanë ndërruar jetë ditën e djeshme apo sot.
Grupi hetimor nën drejtimin e Prokurorisë po punon për sqarimin e rrethanave dhe dokumentimin e plotë ligjor të ngjarjes.
