Katër ushtarë të Forcave të Armatosura shqiptare do t’i bashkohen komandës së NATO-s në Wiesbaden të Gjermanisë, për të kontribuar në ndihmën dhe trajnimin e Ushtrisë së Ukrainës.
Vendimi është marrë në mbledhjen e sotme të Këshillit të Ministrave, teksa ka si qëllim mbështetje direkte për forcimin e kapaciteteve të ushtrisë ukrainase në kuadër të luftës ndaj agresionit rus.
Misioni i personelit shqiptar do të ketë një kohëzgjatje 3-vjeçare, me rotacion prej 180 ditësh për secilin ushtar.
Ministria e Mbrojtjes do të mbulojë të gjitha shpenzimet për pjesëmarrësit, përfshirë dietat, akomodimin, ushqimin, sigurimet dhe shpenzimet për shërbimet e tjera të nevojshme, si transporti dhe mbështetje shëndetësore.
