Gjykata e Posaçme ka pushuar çeshtjen ndaj Arsen Preçit dhe Arben Spahiut, dy “besnikëve” të Erjon Alibejt, i njohur si “Krymi”, kreu i një grupi kriminal në qytetin e Elbasanit. Çështja u pushua me kërkesë të prokurorit të SPAK, Behar Dibra.
Arsen Preçi dhe Arben Spahiu u arrestuan në muajin Shkurt të vitit 2023, pasi më parë Policia e Elbasanit kishte gjetur në zonën e “ish-Konservimit” një automjet “BMW X6”, që kishte brenda 3 automatikë dhe dy shishe me benzinë.
Gjatë kontrollit të zonës, uniformat blu gjetën edhe dokumente të falsifikuara greke me foto të Arben Spahiut, si dhe një bisht cigareje të brenda makinës “BMW” që Prokuroria e Elbasanit tha se i përkiste Arsen Preçit.
Ata dyshohet se do të kryenin atentat dhe pas provave të mësipërme, Prokuroria e Elbasanit ia referoi çështjen SPAK-ut, ku tashmë ka vendosur të pushojë hetimet.
Dyshimet ishin se Arben Spahiu (i cili është i martuar me motrën e Erjon Alibej) do të godiste për hakmarrje, pasi ai është vëllai i Ardit Spahiut (Arjani i vogël), i cili u vra në Belgjikë, por edhe i Rigers Spahiut, i kapur në tetor 2022 me një arsenal armësh në Elbasan.
Shënjestra e atentatit të grupit të Alibejt dyshohet se ishte Elton Kila, i njohur si “Oti i Elbasanit”. Emri i tij doli ne drite pas arrestimeve në kuadër të operacionit “Plumbi i Artë”, me Nuredin Dumanin që rrëfeu se në vitin 2022 kishte marrë porosi për ta ekzekutuar, por kishte dështuar në ndjekjen e tij. Elton (Kastriot) Kila i ka shpëtuar 4 herë deri më tani ekzekutimeve mafioze.
Kujtojmëse Erjon Alibej është i akuzuar dhe i burgosur për të paktën 2 vrasje në Elbasan, teksa tashmë është kthyer në një të penduar të drejtësisë. Ai kishte rivalë grupin e Franc dhe Hajdar Çopjave, të cilët u goditën pak kohë më parë nga SPAK dhe dyshohet se kanë porositur dhe vrasjen e Ardit Spahiut, si dhe të Endrit Alibejt.
