Engjëll Cani, babai i 14-vjeçarit Martin Cani, ka dëshmuar këtë të mërkurë për herë të parë për grupin hetimor për vrasjen e të birit, pranë shkollës 9-vjeçare “Fan Noli” në kryeqytet, mesditën e 18 nëntorit, pas përfundimit të mësit.
Mësohet se deklarimet ai i ka dhënë në Drejtorinë e Policisë së Tiranës, për llogari të hetimeve që drejtohen nga Prokuroria e kryeqytetit.
Burime për mediat bëjnë me dije se ai ka thënë se nuk ishte vënë në dijeni nga shkolla apo instancat e tjera rreth një konflikti që ka patur 4 ditë para ngjarjes i biri me autorin e dyshuar të vrasjes Mario Përlleshi.
Babai i të ndjerit pretendoi se bashkëshortja e tij ka marrë vetëm një telefonatë nga shkolla për çfarë kishte ndodhur, dhe pavarësisht tentativave për t’u lidhur me stafin e shkollës, nuk iu është ngritur telefoni. Engjëll Cani thotë se atë çfarë ka ndodhur e ka mësuar pasi ka mbërritur në spital.
I pyetur nëse a është kontaktuar pas ngjarjes nga familja e autorit të dyshuar, teksa Engjëll Cani ka deklaruar se deri më sot nuk ka ndodhur diçka e tillë.
Ndërkohë, ditën e sotme, mësohet se Engjëll Canit i janë kthyer sendet e Martinit, çanta e shkollës me libra, e cila ishte sekuestruar në vendin e ngjarjes nga efektivët e policisë.
Autori i dyshuar i krimit, Mario Përlleshi ndodhet në masën “Arrest në burg”, në pritje të vendimit të Apelit, pasi avokatët e tij e kanë kundërshtuar vendimin e Shkallës së Parë me pretendimin se ngjarjen e ka kryer në kushtet e vetëmbrojtjes dhe kërkojnë një masë më të butë.
Në atë ngjarje mbeti i plagosur edhe shoku i Martinit, Luis Meçja, i cili është nisur për kurim drejt Italisë.
Vrasja e Martinit/ Autori kërkon daljen nga qelia, dëshmia e tij mbahet sekret
