Raportimet e fundit nga Italia sugjerojnë se drejtori sportiv i Milanit, Antonio D’Ottavio, është larguar nga posti i tij pas një serie mosmarrëveshjesh strategjike me këshilltarin e klubit, Zlatan Ibrahimovic.
Megjithëse klubi ende nuk ka dhënë një deklaratë zyrtare mbi këtë çështje, ‘Calciomercato.com’ dhe burime të tjera raportojnë se D’Ottavio ka pranuar të largohet nga pozita e tij si drejtor sportiv i kuqezinjve.
D’Ottavio ishte pjesë e Milanit që nga viti 2017, fillimisht si kreu i skautimit, përpara se të kalonte në rolin e drejtorit sportiv.
Sipas lajmit të publikuar këtë pasdite, D’Ottavio dhe Ibrahimovic kanë pasur disa mosmarrëveshje lidhur me planet për ekipin e parë, projektin ‘Milan Futuro’ dhe ekipet e të rinjve të kuqezinjve.
‘Calciomercato.com’ raporton se Ibrahimovic dhe drejtori teknik Moncada do të mbeten në rolet e tyre dhe do të vazhdojnë të jenë “shtylla kurrizore” e strukturës menaxheriale të ekipit të parë.
Jovan Kirovski do të vazhdojë të drejtojë projektin ‘Futuro’ si drejtor teknik.
Po ashtu, thuhet se drejtuesit e lartë kuqezi tashmë kanë një listë kandidatësh të përgatitur për të zëvendësuar D’Ottavio-n, ku përfshihen emra si Dario Audasio dhe Roberto Carrario.
