Gjykata e Posaçme ka caktuar ditën e sotme masën e sigurisë “arrest me burg” për 48-vjeçarin Fuad Verzivolli, ndaj të cilit u lëshua urdhër-arresti nga SPAK në kuadër të operacionit për goditjen e bandës së Suel Çelës.
Burime bëjnë me dije se Fuad Verzivolli është arrestuar dy ditë më parë, mbrëmjen e 1 Dhjetorit në Shqipëri dhe kjo është arsyeja pse ai doli ditën e sotme para togave të zeza për rivlerësimin e masës së sigurisë.
Vendimi është marrë nga gjyqtari Erjon Çela, teksa mbi 48-vjeçarin rëndojnë akuzat për veprat penale “Vrasje me paramendim” e mbetur në tentativë, kryer në formë të veçantë të bashkëpunimit atë të organizatës kriminale “Organizata kriminale”, dhe “Kryerja e veprave penale nga organizata kriminale dhe grupi i strukturuar kriminal”.
Fuad Verzivolli dyshohet se ka marrë pjesë në atentatin e 8 Qershorit të vitit 2020 ndaj Ardian Çapja, i cili u qëllua me snajper brenda oborrit të vilës së tij në Elbasan, teksa qitësi i dyshuar Prekë Kodra ishte pozicionuar në kodrën e Krastës.
Fuad Verzivolli i ka shpëtuar më parë një atentati më 6 maj 2017, ku ndaj makinës së tij u 1 kg tritol C4, por e cila dështoi për shkak të mekanizmit të gabuar. Për këtë ngjarje, Gjykata e Elbasanit deklaroi fajtor Astrit Sinanajn duke e dënuar me 25 vite burg. Por biznesmeni Verzivolli bëri me faj Florenc Çapjan për këtë ngjarje, pasi nuk kishte asnjë njohje me Astrit Sinanajn.
