Tirana ka një rekord më vete. Klubi, në gjashtë derbet e fundit, përfshirë edhe këtë që do të luhet ditën e diel është drejtuar nga 4 trajnerë të ndryshëm.
Sezonin e shkuar 2023-2024, në tre derbe, Tirana ka pasur për trajner Julian Ahmatajn. Pas shkarkimit të Amatajt menjëherë pas konferencës për shtyp në prag të sfidës me Dinamon, bardheblutë u morën nga Erbim Fagu që e drejtoi sfidën e fundit me Partizanin.
Në kampionatin e sivjetshëm, derbin e parë e drejtoi Bledi Shkëmbi, i cili ishte trajneri i tretë në pesë ndeshje me Partizanin. Në sfidën e dytë të këtij sezoni, Tirana do të ketë në stol Gugash Maganin. Peqinasi është trajneri i katërt në gjashtë takimet e fundit që do të përballet me Partizanin.
Tirana dhe Gugash Magani, të dielën do të përballen me Partizanin. Një ndeshje “elite” për trajnerin e ri të Tiranës, që nëse ia del këtë herë ndaj të kuqve, te Tirana sjell fitoren në derbi pas dy viteve dhe 2 muajve.
Një sfidë, që për peqinasin, sjell gëzime e pengje të shumta. Për ata që nuk e dinë, Magani në aventurën e tij të parë si kryeqytetas, ka luajtur gjashtë derbe ose ndeshjet speciale të tifozëve.
Një nga arsyet që Magani u pëlqye nga tifozët ishte karakteri dhe fitimi i derbit. Si tekniku i dytë më jetëgjatë në epokën “Halili”, Magani ka luajtur gjashtë takime kundër të kuqve si trajner i Tiranës. Në të gjithë ndeshjet, trajneri i ri i bardhebluve ka marrë një fitore, dy humbje dhe tre barazime.
Në debutimin e tij me Partizanin, Magani dhe Tirana e tij ia dolën që të fitonin ndeshjen e parë në 7 shkurt 2014. Asokohe, shënonte Gilberto dhe bardheblutë merrnin tri pikët. Sfida tjetër e atij kampionati u mbyll 1-1 me golat e Nexhipit dhe Morinës.
Kampionatin e ardhshëm, Magani e nisi me një barazim pa gola ndeshjen derbi. Më pas erdhën dy humbjet rresht në sfidën me Partizanin, ku Nexhipi dhe Mazrekaj ishin protagonistët e krahut të kuq, ndërsa Bakaj dhe Morina në krahun e bardhebluve.
