Prokuroria e Posaçme (SPAK) do të marrë në dorë hetimet për atentatin ndaj 28-vjeçarit Klaudio Prendi, i cili u ekzekutua në zonën e “Xhamllikut” në kryeqytet.
Burime për mediat bëjnë me dije se Prokuroria e Tiranës ka shpallur moskompetencë, pasi ka dyshime të arsyeshme se autorët e kësaj ngjarje të rëndë janë pjesë e një grupi të strukturuar kriminal, një vepër penale, e cila i përket për hetim SPAK-ut.
Klaudio Prendi u ekzekutua në një atentat mafioz me armë zjarri me silenciator pak pas mesnatës, rreth orës 00:30 të 19 nëntorit. 28-vjeçari, i cili njihej ndryshe me emrin Klajdi, ishte në një lokal në rrugën “Xhanfize Keko”, pranë kryqëzimit të “Oxhakut” në shoqërinë e disa miqëve të tij.
Makinën e tij ai e kishte parkuar para lokalit, aty ku ndodhet stacioni i urbanit të Porcelanit. Pasi është ndarë nga miqtë, ka dalë i vetëm nga lokali dhe është drejtuar për të hipur në makinë. Pikërisht në këtë moment ai është qëlluar 5 herë me një armë me silenciator. Atentatorët kanë qëlluar nga një automjet “Audi A4”, me targa greke të mbivendosura që vinte nga “Fresku” në drejtim të kryqëzimit ku ndodhi ngjarja.
I plagosur rëndë, me një plumb në kokë dhe një në gjoks, 28-vjeçari me origjinë nga Puka, u dërgua me urgjencë drejt spitalit të Traumës, por nuk arriti dot t’u mbijetonte plagëve të marra. Zemra e tij pushoi së rrahuri, në kohën që makina e atentatorëve po shkrumbohej nga flakët pranë liqenit të Farkës. Aty ku ata shkuan të pa shqetësuar dhe zhdukën çdo provë, bashkë me gjurmët e tyre.
Klaudio Prendi është djali i ish-gjyqtarit Fran Prendi, teksa dyshohet se ai është ekzekutuar për shkak të një borxhi të pashlyer prej rreth 10 mijë eurosh, të cilin ia kishte një personazhi në kryeqytet i njohur si “Kleo i Freskut”.
Ata janë konfliktuar me njëri-tjetrin rreth 5 ditë para se të ndodhte atentati ndaj Klaudio Prendit, në rrugën “Mustafa Matihiti”, e njohur ndryshe si “rrugica e Salës”.
Burime pranë grupit hetimor bëjnë me dije se “Kleo i Freskut” deri në këtë fazë ku ndodhet hetimi, nuk është gjendur. Mësohet se ai ka lidhje miqësore me dy vëllezërit, Erlis dhe Leonard Duka, ky i fundit i arrestuar dhe po gjykohet në SPAK për vrasjen e Santiago Malkos, ndërsa vëllai tjetër Erlisi, vijon të jetë në kërkim.
Ndërkohë një pistë e dytë është dhe ajo e verifikimit të informacioneve se ngjarja mund të ketë ndodhur për shkak të detyrës së babait të viktimës, pasi Fran Prendi ka punuar për disa vite me rradhë si gjyqtar i Krimeve të Rënda dhe Gjykatës së Posaçme SPAK.
Të dhënat e siguruara nga policia kriminale flasin se kohët e fundit është liruar nga burgu një eksponent i botës së krimit, i cili në vitin 2018, u dënua me burg nga Gjyqtari Fran Prendi.
