Prokuroria e Posaçme (SPAK) deklaron se do të ankimojë në Apel vendimin e sotëm të gjyqtares së GJKKO-së, Flojera Davidhi për lirimin e kreut të opozitës, Sali Berisha pas 331 ditësh në izolim, duke i revokuar masën e sigurisë “Arrest në shtëpi”.
Në një reagim për mediat, SPAK shprehet se seanca paraprake për gjykimin në themel të çështjes së privatizimit të ish-kompleksit sportiv “Partizani” vazhdon.
“Pasi Prokuroria e Posaçme të njihet me vendimin e zbardhur të Gjykatës së Posaçme të Shkallës së Parë kundër Korrupsionit dhe Krimit të Organizuar do të vijojë procedurën e ankimimit në Gjykatën e Posaçme të Apelit. Ndërkohë seanca paraprake për gjykimin në themel të çështjes vazhdon në Gjykatën e Posaçme të Shkallës së Parë për Korrupsionin dhe Krimin e Organizuar”, thuhet në reagimin e SPAK.
Kujtojmë se gjatë seancës së sotme, prokurori i SPAK kërkoi që Berisha të vazhdonte të qëndronte në “arrest shtëpie”, por kërkesa u rrezua nga gjyqtarja, sipas së cilës masat e sigurisë ndaj Berishës nuk janë më të nevojshme.
