Gazetarja Klodiana Lala, e ftuar në emisionin “Open”, foli për ngjarjen e rëndë që ndodhi sot ku një nxënës 14-vjeçar i shkollës “Fan Noli” humbi jetën pas një sulmi me thikë 150 metra larg objektit mësimor.
Lala u shpreh se mes viktimës dhe autorit të dyshuar të ngjarjes ka pasur një debat që të premten ku ata janë shtyrë, më pas ka pasur një debat mes tyre sot brenda shkollës dhe disa orë më pas konflikti agravoi duke shkaktuar një viktimë dhe një të plagosur.
“Një oficer policie që është marrë me hetimin e ngjarjes sot më tregoi se nxënësit kanë debatuar të premten, janë shtyrë. Kanë debatuar me njëri-tjetrin sot, i ka thirrur oficeri i sigurisë dhe kanë thënë jemi sqaruar. Nuk duhej të ishin lejuar të dilnin, duhej të thirreshin prindërit, në mënyrë që ky konflikt të mos degradonte”, tha Lala.
Ndërsa u shpreh se kemi një ngjarje shumë të rëndë, gazetarja tha se duhet të reflektojnë institucionet.
“Ka pasur një paketë për sigurinë në shkolla, e cila duket se u harrua rrugës. Ishte një paketë që arrestoheshin ata që shpërndanin drogë në shkolla, që ecnin me shpejtësi pranë shkollave, që shisnin pije alkoolike për fëmijët 13-14 vjeç.
Ne qasemi përditë me situata të tilla. Ky është një rast fatkeq, flagrant dhe shumë i rëndë. Por çdo ditë kemi raste të bullizmave, gjobvënieve, kërcënimeve, shantazheve me foto. Ne duhet të jemi vigjilent, nëse do të ishte ndërhyrë që të premten, nëse do të ishte ndërhyrë sot, nuk do të kishim agravim të situatës. Kemi një viktimë, kemi një të plagosur, kemi edhe një autor që është fëmijë. Histori që nisin në rrjetet sociale, duken si histori banale në dukje, por që u mbyll në mënyrë tragjike. Historitë te të miturit nisin nga më banalet, pse bërë follow në instagram apo tiktok, pse e pe ti atë dhe s’duhet ta shohësh.
Duhet të funksionojnë të gjitha hallkat. Aq tronditje sa familja e të ndjerit kanë dhe të tjerat. Ne kemi pafund raste. Të vajzave që janë abuzuar në shkollë, kanë tentuar vetëvrasjen për shkak të bullizimit, të fotove intime. Kjo ngjarje nuk duhet pranuar aq thjeshtë.
Jam në një alarm gjatë gjithë kohës e shqetësuar për vajzën time. Sado ta kesh edukuar fëmijën brenda mureve të shtëpisë, nuk e kontrollon dot. Jemi në emergjencë kombëtare.
Në këtë moshë fëmijët shfaqin problematikat e tyre. Duhet të shtyjmë pozitivisht gjërat për të ecur përpara. Urgjencës Kombëtare iu desh një kohë e gjatë për të shkuar në vendngjarje. U transportua nga pronari i një biznesi aty afër sepse ambulanca po vononte. Të gjitha këto elementë e bëjnë situatën shumë dramatike.
Ndonjëherë mund të kesh fëmijë të shkëlqyer, por nëse ky fëmijë nuk është i garantuar, shteti nuk ia garanton jetën, për fat të keq mund të bjerë pre e ngjarjeve të tilla. Kjo ngjarje duhet ti bëjë institucionet të reflektojnë, të mos kalohet si sherr të rinjsh.”, tha Lala.
