Prokuroria e Tiranës ka urdhëruar kryerjen e eksperimentit hetimor për vrasjen e biznesmenit 52-vjeçar Eduart Recit, atentat i ndodhur mbrëmjen e të mërkurës në mes të Tiranës, pranë Fakultetit të Histori Filologjisë.
Ky vendim që i është deleguar grupit të hetimit në Polici është marrë pasi nuk është përcaktuar ende vendi se ku qëndronte qitësi, i cili qëlloi me armë zjarri në kokë Reçin. Gjithashtu, nuk është gjetur as gëzhoja, por grupi hetimor ka në dorë vetëm predhën e plumbit.
Deri më tani mbeten të paqarta shumë elementë të kryerjes së këtij krimi, por edhe pistat si dhe autorët. Dyshimet e ekspertëve janë të shumta, ku përfshihet edhe ajo e përdorimit të një pushke sportive.
Nga hetimet paraprake, dyshohet se Eduart Reçi është qëlluar nga një distance prej 20-30 metrash me një pushkë të shkurtër sportive amerikane me dylbi, prodhim i viteve të fundit. Kjo armë kur qëllon nuk bën aq zhurmë sa armët e zakonshme të zjarrit, si dhe e mban gëzhojën brenda në armë.
I filmuar nga kamerat e sigurisë, Eduart Reçi në momentin kur është qëlluar ka qenë duke përdorur celularin. Ky celular i viktimës është dërguar për ekspertim me shpresën se mund të zbulohet ndonjë e dhënë në komunikimet që ka pasur së fundmi.
Dyshohet se vrasja mund të jetë kryer nga një vrasës me pagesë dhe përdorues shumë i mirë i armëve.
Dëshmi në Polici ka dhënë djali i viktimës, i cili ka deklaruar se aktualisht babai i tij nuk ka pasur konflikte. Mësohet se Eduart Reçi në të kaluarën ka patur disa procese gjyqësore në lidhje me konflikte pronësie, por që ishin zgjidhur.
Para disa vitesh, 52-vjeçari ka qenë drejtor në një prej drejtiorive të institucionit të Shërbimit Informativ Shtetëror, teksa vitet e fundit ka qenë i njohur për aktivitetin e tij në ndërtim, pasi ka ndërtuar disa pallate pranë zonës ku iu bë atentati dhe është pronari i kompanisë “ELGM.shpk”.
Biznesmi Eduart Reçi me origjinë nga Dibra ishte babai i dy fëmijëve. Mësohet se pallatin ku jetonte, viktima e kishte ndërtuar vetë.
