Mesfushori Odise Roshi ka vendosur të tërhiqet nga kombëtarja shqiptare e futbollit, teksa prej vitesh nuk grumbullohej me kuqezinjtë.
Lajmin e ka bërë me dije Federata Shqiptare e Futbollit, ku përmes një komunikate falenderon mesfushorin fierak për kontributin e dhënë me fanellën kuqezi.
Gjatë gjithë karrierës së tij me kuqezinjtë, Odise Roshi i njohur edhe me nofkën “Raketa” nga tifozët, numëron 71 ndeshje dhe 5 gola, ndërsa ishte pjesë e skuadrës në kualifikimin historik në “Euro 2016” dhe pjesë e saj në finalet e Europianit.
“Federata e Futbollit e falënderon Roshin për të gjithë kontributin e dhënë ndër vite me fanellën kuqezi, ku do të kujtohet gjithmonë për asistet e tij vendimtar, shpejtësinë dhe energjinë e tij në fushë. I urojmë Odise Roshit suksese të mëtejshme në karrierën e tij.” – thuhet në komunikatën e FSHF-së.
Odise Roshi tërhiqet nga kombëtarja një ditë pasi të njëjtin vendim mori dhe sulmuesi shkodran Bekim Balaj. Të dy ata do të mbahen mend për golin e fitores 1 me 0 në Portugali, i cili dhe i hapi rrugë kualifikimit në Euro 2016. Balaj ishte shënuesi, ndërsa Roshi asistuesi.
Aktualisht Odise Roshi aktivizohet me ekipin turk Erzurumspor, i cili militon në ligën e dytë të Turqisë.
