Gazetari i kronikës, Julian Kasapi ka publikuar në rrjetet sociale një video të qelive të burgut të sigurisë së lartë në “Hania Kreta 1” në Kretë të Greqisë, ku ngre shqetësimin për kushtet çnjerëzore ku qëndrojnë shqiptarët.
Sipas gazetarit, shqiptarët qëndrojnë 6 veta në një dhomë, nuk u jeptet bukë sepse lekët shkojnë tek drejtori, madje sipas tij, nëse i thua gardianit “mos më ofendo” bën dhe 6 muaj burg plus.
Kasapi shkruan më tej se kryeministri Edi Rama shkon e bën paradë muzikore në Greqi, kur në burgjet e fqinjëve jeta e shqiptarëve është bërë lojë gardianësh. Ai i kërkon shtetit shqiptar që të ketë “kurajon” që t’ia adresojë si shqetësim.
Postimi i plotë:
Çdo i dënuar shqiptar në burgjet Greke përballet me kushte çnjerëzore. Pas historive të cilat kanë përfunduar në tragjedi me gardianë grekë burgjesh, pas trajtimeve makabre të cilat edhe janë filmuar në paraburgimet Greke e kur Greqia zyrtare tallet me gazetarët shqiptarë e kryeministri shkon e bën paradë muzikore, në burgjet e fqinjëve jeta e shqiptarëve është bërë lojë gardianësh.
Pavarësisht se video më poshtë do të shërbejë si dënim mbi dënim duhet treguar se shqiptarëve nuk u jepet bukë, mbi 6 persona në një dhomë, po i the gardianit “mos më ofendo” ke për taksirat 6 muaj burg plus, nëse shteti ka për detyrë të paguajë ushqimin paratë shkojnë tek drejtori. Pamjet tregojnë burgun e sigurisë së lartë Hania Kreta 1.
Pak kohë më parë OKB i kërkoi Izraelit nje hetim për nje palesinez te vdekur ne burgun e këtij vendi. Shpresoj që shteti shqiptar të ketë “kurajo” përballë denigrimit të bashkëkombasve të cilët për shkak të veprave të tyre vuajnë dënimet e caktuara por kjo nuk nënkupton denigrimin, torturat, dhe masat fashiste të një vendi pjesë e Bashkimit Evropian.
