Gjykata e Posaçme kundër Korrupsionit dhe Krimit të Organizuar ka pushuar hetimin për mashtrim ndaj deputetit socialist, Agron Çela.
Gjyakata e mori vendimin me kërkesë të SPAK-ut. Vendimi u mor nga gjyqtari Erjon Çela. Hetimet ndaj deputetit Çela nisën pasi një qytetar e kallëzoi se s’i kthente paratë e marra borxh. Megjithatë, nga hetimet e kryera ka rezultuar se borxhi ishte paguar.
Prokuroria e Posaçme kundër Korrupsionit dhe Krimit të Organizuar me datë 15.10.2024 paraqiti pranë Gjykatës kërkesën me objekt: “Kërkesë për pushimin e procedimit penal nr. 22 të vitit 2024.
“U vendos Pranimi i kërkesës së Prokurorisë së Posaçme Kundër Korrupsionit dhe Krimit të Organizuar. Pushimin e çështjes penale që i përket procedimit penal nr. 22 i vitit 2024 i Prokurorisë së Posaçme kundër Korrupsionit dhe Krimit të Organizuar regjistruar për veprën penale “Mashtrimi” e parashikuar nga neni 143/1 i Kodit Penal, pasi në zbatim të nenit 328/1 pika 1, gërma “b”, të K.Pr.Penale, nga hetimet e kryera fakti nuk parashikohet nga ligji si vepër penale”, thuhet në vendimin e GJKKO.
