Avokati Ylli Manjani ka folur në lidhje me sistemin e drejtësisë në vend.
Manjani ka bërë të ditur se, aktualisht ka një statistikë të frikshme në lidhje me gjykatat, që pranojnë gati 100 për qind, kërkesat e prokurorëve. Sipas tij, kur ndodh kjo gjë, atëherë duhet të themi se, drejtësia nuk ekziston më.
“Çfarë ndodh në Shqipërinë e sotme, në kohën kur gjykata e Romës i bie me shpullë kryeministres së vendit të vet. A dini ju ndonjë gjyqtar në Shqipëri, apo gjykatë ti bjerë me shpullë Edi Ramës. Po ju them një statistikë të frikshme, është gati 100% pranueshmëria e kërkesave që bëjnë prokurorët në sallën e gjyqit. Pala tjetër sikur nuk ekziston fare.
Dhe sot nuk ka dalë një gjykatë që të thotë boll, por ka 100% pranueshmëri, statistikisht kjo është një provë fatale që tregon se drejtësia nuk ekziston. Nëse çdo gjë që thonë prokurorët, miratohet pa asnjë debat, me 100 % apo afër këtij numri, drejtësia nuk ekziston. Ata që mbajnë mend nga komunizmi, ata e dinë shumë mirë. Çfarë thoshte prokurori atëherë bëhej, por të paktën ai regjim ishte më i sinqertë, se nuk kishe avokat fare.
E po ju them se kjo është një situatë dramatike, alarmante dhe nëse populli shqiptar nuk e kupton këtë, atëherë prisni policin tek dera. Garancia si element i bashkëjetesës në këtë vend, si element i të jetuarit paqësisht në këtë vend, ka rënë. Të vrasësh një njeri në vendin tonë, pas 20 vitesh ta fshinë nga dosja. Por nëse çuni jot kapet me një cigare hashash, edhe pas 100 vitesh, drejtësia të merr pronën. Pra pasuria, prona sot është e pasigurtë. Sot kriminalizohet edhe kontrata noteriale, marrëveshja e imja dhe e jotja mund të quhet krim. Çfarë mund të bësh këtu”, tha Ylli Manjani në SYRI TV
