Gazetari Klodian Tomorri deklaroi në emisionin “Të Paekspozuarit” se biznesmeni italian Francesco Becchetti, i cili fitoi arbitrazhin me qeverinë shqiptare për çështjen e mbylljes së televizionit “Agon Channel”, e ka përdorur shpesh skemën e gjyqeve në Arbitrazh, siç ndodhi me “Deutche Bank’ të cilës i mora mbi 200 milionë euro.
Ai tha se Becchetti është skemaxhi, siç tregojnë edhe provat e publikuara së fundmi, por sipas tij, fajtor kryesor për humbjen e gjyqit dhe dënimin e shtetit shqiptar është arroganca e qeverisë dhe zyrtarëve të saj.
“Qeveria kontraktoi një investigues privat për këtë çështjen e Arbitrazhit me Becchettin. Kompani për të investiguar atë që Beçhetti e ka marrë me mashtrim. Ai është biznesmen që e ka bërë shpesh lojën e arbitrazheve dhe ka fituar shumë. I ka bërë gol Deutsche Bank 200 e ca milionë euro. Pra ka qenë një lojtar dhe skemazhi i prirur drejt kësaj industrie. Sipas dëshmive që kanë publikuar, qoftë edhe duke intervistuar disa njerëz me njohuri për çështjen, pretendimi është se Becchetti e ka blerë trupin gjykues që dha vendimin për të gjobitur Shqipërinë me 110 milionë euro, pasi ka ofruar biznese familjarëve të gjyqtarëve, ka ndikuar në emërimin e gjykatësve dhe e ka patur fitoren në tavolinë.
Janë prova që qeveria ka tentuar t’i përdorë në procese gjyqësore në Belgjikë, sepse aty janë paratë e Albcontrol, por nuk i janë pranuar nga gjykata belge. Madje vendimi i fundit i gjykatës së shkallës së parë të Brukselit e ka çuar Becchettin një hap më afër konfiskimit të parave, sepse ato janë të sekuestruara. Gjithë hapësira ajrore e Shqipërisë ka punuar në funksion të Becchettit.
Paratë kanë mbetur të bllokuara, tashmë po shkohet drejt konfiskimit. Rama është përbetuar me qindra herë publikisht që Becchetti nuk merr asnjë qindarkë, por mesa duket po shkon drejt marrjes së parave. Qeveria ka aktivizuar edhe këto investigime, për të thënë që ky e mori me mashtrim. Por, problemi është i tillë. Becchetti mund të jetë skemaxhi, por fajin kryesor është arroganca. Jo vetëm nuk ishin vigjilentë, por bënin statuse dhe çonin mesazhe që më vonë u përdorën si prova për të dënuar Shqipërinë”– tha Tomorri.
