Ka mbaruar mbledhja e grupit parlamentar të Partisë Demokratike në selinë blu.
Kreu i grupit, Gazment Bardhi deklaroi se opozita do të marrë pjesë në diskutimet për Buxhetin 2025.
Opozita do të rikthehet pjesë e punimeve të seancave plenare në Kuvend ku do të përballen me socialistët. Bardhi hodhi akuza ndaj mazhorancës e cila sipas tij po vjedh taksat e shqiptarëve nëpërmjet aferave korruptive.
Bardhi iu përgjigj dhe deklaratës së ambasadorit të BE-së javën e shkuar, i cili kërkoi nga opozita që të bënte detyrat e saj brenda parlamentit.
Bardhi theksoi se ambasadori duhet të gjejë guximin t’i thotë Kryeministrit Rama që opozita të lejohet në punimet e Kuvendit dhe mos të përdoret një rregullore e shfuqizuar nga Kushtetuesja për të përjashtuar ligjvënësit demokratë.
“Gjej rastin për ta bërë publike, meqë keni dëgjuar edhe deklarata qesharake deri diku, që deputetët e opozitës duhet ta bëjnë detyrën brenda parlamentit. Ne, duke nisur nga sot, do të jemi brenda parlamentit. Do të jenë deputetët për të bërë detyrën e tyre në komisione, për t’i shpjeguar shqiptarëve se çfarë buxheti ka bërë Edi Rama, edhe ata deputetë që kanë qenë të përjashtuar. Ata që deri dje në mënyrë të pashpjegueshme bënin thirrje opozitës që të jetë brenda parlamentit, uroj shumë të gjejnë guximin t’i thonë Edi Ramës të lërë opozitën të bëjë detyrën e saj në Kuvend. Edi Rama përdor një rregullore të shfuqizuar nga Gjykata Kushtetuese që të mos lejojë opozitën në Kuvend. Deputetët e mazhorancës siç e kanë shfaqur në 12 vite të miratimit të buxhetit janë kartona që i shërbejnë interesave të Ramës dhe e një grushti njerëzish pa patur në vëmendje pensionistët, fermerët, shtresat në nevojë. Grupi i PD do të jetë përballë mazhorancës në diskutimin për Buxhetin. Ky nuk është buxheti i shqiptarëve por i 5 individëve. Ky është buxheti i Belinda Ballukut me aferat e saj korruptive, buxheti i Erion Veliajt me aferat “5D”. Pra ky nuk është buxheti i qytetarëve. Do të bëjmë çdo propozim për ta kthyer këtë buxhet për qytetarët”, tha Bardhi.
Edhe pse opozita do të rikthehet në Kuvend gjatë diskutimeve për buxhetin, Bardhi theksoi se nuk ka asnjë vendimmarrje të PD-së për të rikthyer normalitetin e jetës parlamentare.
“Po e sqaroj, nuk ka pasur asnjë vendimmarrje të grupit parlamentar që nuk ka për të patur normalitet. Kur të ketë një vendimmarrje të tillë, unë do të dal ta shpall publikisht së bashku me kushtet që do të na rikthenin në normalitet,” tha Bardhi.
