Teksa të mërkurën kanë paralajmëruar një protestë para kryeministrisë, pensionistët sot kanë bërë thirrje për protestë masive jo vetëm për bashkëmoshatarët e tyre, por përkrah të dalin dhe të rinjtë e studentët.
Gjatë një deklaratë për mediat, ata deklaruan se Edi Rama ka mbjellë përçarje dhe urrejtje në mesin e pensionistëve, duke bërë dëgjesa publike vetëm me militantë, siç i kanë cilësuar ata pjesëmarrësit në takimin e kryeministrit.
Pensionistët shprehen se nuk do të heshtin përballë padrejtësive të kësaj qeverie.
“Rama na urren ne dhe shqiptarët. Duke thirrur ca dordoleca qe e lavdërojnë, ka bërë përçarje. Të dalin nesër këtu e të protestojnë. Të rinjtë e studentët të vijnë e të na mbështesin në këtë protestë, se ky dikator s’merr vesh me fjalë, do masivitet. Nëse në dy protesta kanë dalë mbi 500 pensionistë, ata barazohen me 500 pensionistë militantë të partisë.
500 pensionistë janë si 500 spartanët përballë pensionistëve militantë. Militantët lodhen, ne s’jemi të lodhur e as të paguar. Duke heshtur, mos kujtojë se do lodhemi. Na ka përbuzur, na ka torturuar ky diktator i pamëshirshëm.
Nesër në ora 10 të gjithë, edhe të pamundurit të dalim ta bllokojmë, se s’ka ku të shkojë. Atij i ka hyrë ujë nën këmbë”, thanë pensionistët.
