Lideri i Partisë Demokratike, Sali Berisha, ka reaguar publikisht për zgjedhjen e Kemi Badenoch si udhëheqëse e re e Partisë Konservatore në Mbretërinë e Bashkuar.
Në postimin e tij në Facebook, Berisha e cilëson këtë një moment historik, duke theksuar se për herë të parë kjo parti zgjedh një kryetare me origjinë afrikane.
Ai i ka uruar suksese zonjës Badenoch në udhëheqjen e saj dhe ka shprehur dëshirën për të forcuar lidhjet tradicionale mes dy partive.
“Kemi Badenoch, lider e Partisë Konservatore të Britanisë së Madhe. Të dashur miq, dje partia Konservatore e Mbretrisë së Bashkuar zgjodhi lider të saj të ri deputeten e kësaj partie, ish-ministren, Zonjën Kemi Badenoch.
Kjo është një zgjedhje historike sepse për herë të parë në histori kjo parti zgjedh kryetare të saj një grua me origjinë afrikane, por lindur në Londer.
Me këtë rast në emër të Partisë Demokratike i uroj kryetares së zgjedhur të Partisë Konservatore, të nderuarës Kemi Badenoch urimet më të mira dhe suksese në udhëheqjen drejt pushtetit të kësaj partie si dhe shpreh dëshirën e vazhdimit të bashkëpunimit tradicional midis dy forcave tona politike”, shkruan Berisha.
