Makina që shihni në foton e mësipërme është në pronësi të Renato Çepës, të cilës në orët e para të mëngjesit të sotëm do t’i vendosnin një sasi eksplozivi në Elbasan.
Atentatorit, një i ri 24-vjeçar, identiteti i të cilit ende nuk dihet, i shpërtheu aksidentalisht sasi e eksplozivit në dorë në momentin kur do e vendoste dhe siç shihet automjeti “Volkswagen” i Çepës është dëmtuar në pjesën e përparme. Ngjarja ka ndodhur rreth orës 04:10, në lagjen “Shënkoll”.
I riu mbeti i plagosur dhe u transportua me urgjencë në spital, por fatkeqësisht nuk ka arritur dot t’u mbijetojë plagëve të marra dhe ndërroi jetë.
40-vjeçari Renato Çepa është një person me precedent penal dhe një shok i Emiljano Ramazanit, i cili u ekzekutua më 20 korrik 2020, vetëm pak sekonda pasi ishte ndalur me makinën e tij në sheshpushimin e pallatit ku banonte në vendin e njohur si “Rrethrrotullimi i Luleve” në Elbasan.
Viktima i ngjarjes së natës kaluar dyshohet se është pjesë e një grupi kriminal dhe trupi i pajetë ndodhet ende në morgun e Spitalit Rajonal të Elbasanit.
Autoritetet bëjnë me dije se është ngritur një grup i posaçëm hetimor me specialistë për Hetimin e Krimeve të Rënda të Policisë së Elbasanit dhe Departamentit të Policisë Kriminale në drejtimin e Prokurorisë, të cilët vijojnë punën për zbardhjen e ngjarjes.
Grupi hetimor i ngritur për rastin, po heton konfliktet e mundshme të shënjestrës së atentatit që mbeti në tentativë Renato Çepës.
