Partia Demokratike ka dalë me një komunikatë zyrtare pas mbledhjes së sotme në selinë blu të kryetarëve të degëve me drejtuesit politik të Qarqeve, ku në fokus të diskutimeve ishte protesta e 29 Tetorit.
Tashmë është e konfirmuar se protesta nuk do të përqëndrohet vetëm në Tiranë, si ajo e 7 Tetorit, por do të bllokohen disa prej akseve kryesore në të gjithë vendin.
Më konkretisht, sipas PD-së, do të bllokohen: segmenti Casa Italia – Sheshi “Shqiponja”, rrethrrotullimi Milot, rrethrrotullimi Shkozet, rrethrrotullimi Bradashesh, rrethrrotullimi Rrogozhinë dhe rrethrrotullimi në Levan. Protesta pritet të nisë në orën 17:00.
Kjo protestë bëhet në kuadër të aksionit për mosbindje civile, për shkak se PD kërkon Qeveri teknike para zgjedhjeve parlamentare të vitit 2025 për të mbajtur zgjedhje të lira dhe të ndershme.
Protestës së 29 Tetorit është deklaruar se do t’i bashkohen edhe anëtarët e Partisë së Lirisë.
Komunikata e zyrës së shtypit të PD-së:
Në mbledhjen e thirrur sot në selinë e Partisë Demokratike nga Sekretari i Përgjithshëm, Flamur Noka me drejtues Politik dhe kryetarë të degëve të vendit u vendos si më poshtë vijon. ⤵️
❗️Ditën e martë, më datë 29 Tetor 2024, në ora 17:00 mosbindja civile zbret në akset kryesore të Shqipërisë.
• Segmenti Casa Italia – Sheshi “Shqiponja”
• Rrethrrotullimi Milot
• Rrethrrotullimi Shkozet
• Rrethrrotullimi Bradashesh
• Rrethrrotullimi Rrogozhinë
• Rrethrrotullimi Levan
