Janë publikuar pamje të reja nga arrestimi i sotëm i ish-Presidentit të Republikës, Ilir Meta, i cili u arrestua dhunshëm tek kthesa e Kamzës në Tiranë, duke u tërhequr zvarrë nga automjeti i tij.
Në video shfaqet momenti kur disa makina të agjentëve të Forcave Operacionale rrethojnë automjetin e Ilir Metës dhe më pas efektivët të mbuluar me kapuça të zinj sulen drejt kreut të Partisë së Lirisë dhe shoferit të tij.
“Hiqe telefonin” dëgjiohet një prej policëve, i cili i drejtohet qytetarit që po filmon rastësisht momentin e aksionit, teksa sapo mbërrijnë tek automjeti i Metës ata bërtasin “Dil nga makina!”.
Kjo video rrëzon versionin e Policisë, e cila tha se efektivët fillimisht i kishin paraqitur Metës vendimin e Gjykatës, por kishin marrë refuzim dhe kundërshtim nga ky i fundit, si dhe iu ishte drejtuar me fjalë fyese.
Por, ajo që vihet re në videon e mëposhtme, shihet se që në momentin e parë, “kapuçat e zinj” shihen agrersivë ndaj Metës, si të ishte një kriminel i bandave të Meksikës apo Kolumbisë.
